சீனாவின் மடியில் தலை சாய்க்கும் இலங்கை

இலங்கை தற்போது சீனாவிடம் பெரும் கடனை வாங்கிவிட்டு அடைக்க வழிதெரியாமல் மீளவும் சீனாவிடமே கடன் வாங்கி விழி பிதுங்கி நிற்கின்றது. குறிப்பாக முன்னாள் அதிபர் இராஜபக்‌ஷ காலத்தில் பெரும் கடன்களை அவர் சீனாவிடம் இருந்து பெற்று இலங்கையின் உள்கட்டுமானத்தை விரிவாக்க முயன்றார். இதன் மூலம் துறைமுகங்கள், வான் ஊர்தி தளங்கள், அதிவேக சாலைகள், நிலக்கரி மின் பிறப்பாக்கி நிலையம் என்று பல கட்டுமானப் பணிகள் விறு வெறு வென நடக்கத் தொடங்கின. சுமார் $5 பில்லியன் பெறுமதியான கடன் இக்காலத்தின் போது இலங்கை சீனாவிடம் இருந்து பெற்றுக் கொண்டது.

இலங்கையின் மொத்த கடனில் சீனாவிடம் வாங்கிய கடன் சுமார் 10% மட்டுமே. ஆனாலும் சீனாவின் கடன்களுக்கான வட்டி வீதம் மிகவும் அதிகமானது. அண்ணளவாக சீன கடன்கள் சுமார் 6.3% வட்டி வீதத்தில் வழங்கப்படுகின்றது. இதே வேளை ஆசிய அபிவிருத்தி வங்கி தனது கடன்களை சுமார் 0.25% – 3% இடைப்பட்ட வட்டி வீதத்திலேயே வழங்குகின்றது. மேலும் இலங்கைக்காக இந்தியா சுமார் 1% என்ற வட்டி வீதத்திலேயே கடன்களை வழங்குகின்றது.

இலங்கையின் மொத்த உள்நாட்டு உற்பத்தியில் (Gross Domestic Product) சுமார் 77% கடன் செலுத்தவே முடிந்துவிடுகின்றது. பாக்கிஸ்தான், மலேசியா, தாய்லாந்து போன்ற நாடுகளில் கூட இவ்வளவு கடன்சுமை கிடையாது. மொத்தமாக $55 பில்லியன் டாலர்கள் வெளிநாட்டுக் கடனாக இப்போது இலங்கை செலுத்த வேண்டியுள்ளது என்று கணிக்கபட்டுள்ளது. இது குறையும் என்றே தெரியவில்லை. நாளொறு மேனியும் பொழுதொரு வண்ணமுமாக இது மெல்ல மெல்ல கூடிக் கொண்டே செல்கின்றது.

ஹம்பாந்தோட்டைத் துறைமுகம், வானூர்தி நிலையம்

இலங்கையின் முன்னாள் அதிபர் இராஜபக்‌ஷ காலத்தில் தென் இலங்கையில் ஹம்பாந்தோட்டை எனும் இடத்தில் சீனா ஒரு துறைமுகத்தையும், வான் ஊர்தி தளத்தையும் அமைத்தது. ஹம்பாந்தோட்டை இலங்கை அதிபர் இராஜபக்‌ஷவின் சொந்த ஊர் என்பதை இங்கே சொல்ல வேண்டும்.

மத்தளை வானூர்தி நிலையம்

இவை அமைக்கப்பட்ட பின்னர், இவை வணிக ரீதியில் இலாபம் ஈட்டவேயில்லை. இந்த இரண்டு முன்னெடுப்புகள் வெறும் வெள்ளை யானையாகி இலங்கை அரசிற்கு வெறும் வெட்டிச் செலவாக மாறியது. இவற்றை அமைக்க சீனா பெரும் கடன் வசதிகளை அரசிற்கு வழங்கியது என்பது இங்கே குறிப்பிடத்தக்கது. பில்லியன் அளவில் செலவு செய்து கட்டிய வானூர்தி நிலையத்திற்கு விமானங்களே வருவதில்லை என்றால் எவ்வளவு நகைப்பிற்கான விடயம் என்பதை யோசித்துப் பாருங்கள். ஒரு நாளைக்கு ஒரு விமானம் வந்தாலே பெரும் விடயமாக உள்ளது. ஒரு நாளைக்கு ஒரு விமானம் வரும் வானூர்தி நிலையம் பற்றி நீங்கள் கேள்விப்பட்டதுண்டா?

துறை முகத்தை அமைக்க மட்டும் சுமார் $1.5 பில்லியன் செலவாகியது (Indiatimes.com, 2018). வெளிநாட்டு அரசொன்று இலங்கையில் முதலீடு செய்த அதிகமான தொகை இதுவென்பதும் குறிப்பிடத் தக்கது.

ஹம்பாந்தோட்டை துறைமுகம்

2015இல் இராஜபக்‌ஷ அரசு தோல்வியுற்று ரணில் விக்ரமசிங்க, மைத்ரிபால சிரிசேன தலமையிலான அரசு பதிவியேற்றது. கடும் சுமையில் இருந்த இலங்கை அரசின் கடன் சுமையைக் குறைக்க, 2017 இல் ஹம்பாந்தோட்டைத் துறைமுகத்தை குத்தகை அடிப்படையில் சுமார் 99 ஆண்டுகள் வழங்கப்பட்டது. இந்த ஒப்பந்தத்தின் அடிப்படையில் $1.5 பில்லியன் கடனில் சுமார் $1.1 பில்லியன் கடனை சீனா மீளப் பெற்றுக் கொண்டது. ஆக, வெறும் $0.4 பில்லியன் மட்டுமே இலங்கை மீளச் செலுத்த வேண்டும்.

துறைமுக நகரம் (தென் ஆசியாவின் வியாபார மையம்)

கொழும்புத் துறைமுக நகரம் வழமை போல முன்னாள் அதிபர் மகிந்த இராஜபக்‌ஷ காலத்தில் ஆரம்பிக்கப்பட்ட ஒரு செயற்றிட்டமாகும். எத்தனை நாட்கள்தான் சின்ன சின்ன செயற்றிட்டமாகவே செய்வது என்றெண்ணி ஆரம்பித்த திட்டமாக இருக்க வேண்டும். 2014 அளவில் ஆரம்பிக்கபட்ட இந்த செயற்றிட்டத்தின் படி கொழும்புத் துறைமுகம் விஸ்தரிக்கப்பட்டு ஒரு துறைமுக நகரம் அமைக்கப்படும். அந்த நகரின் சிறப்பு என்னவென்றால், இந்த நகரம் இன்று கடலாக இருக்கும் பகுதியில் மண்ணை நிரப்பி அதில் அமைக்கப் படுவதே. இதன் மூலம் 2.33 சதுரக் கிலோமீட்டர் அளவான நிலப்பரப்பு கடலில் இருந்து மீள நிலத்துடன் இணைக்கப்படும்.

எல்லாம் சரி ஆனால் இதில் ஒரு இடக்கு முடக்கான விடயமும் உள்ளது. இவ்வாறு கடலை நிரப்பி அமைக்கப்படும் நிலப்பரப்பில் கிட்டத்தட்ட அரைப் பகுதி சீனாவிற்கு உரியதாக கையளிக்கப்படும். இதையறிந்ததும் இந்தியா மற்றும் அமெரிக்கா போன்ற நாடுகள் மிகவுமே கடுப்பாகிப் போயின.

2015 இல் அதிபர் இராஜபக்‌ஷ தோல்வியடைந்து ரணில், மைத்திரி அரசு பதவிக்கு வந்து இரண்டு மாதங்களில் (மார்ச் 2015), இந்தச் செயற்றிட்டதை இடை நிறுத்தி வைத்தனர். செயற்றிட்டத்தை ஆரம்பித்த விதம், நடத்திய விதம், சூழல் தாக்கங்கள் போன்றவற்றில் சந்தேகம் இருப்பதாகக் கூறி இந்தச் செய்றிட்டத்தை தற்காலிகமாக முடக்கினர்.

ஆனால் சீனத்து ட்ராகனின் முன்னால் சிறு பல்லி போன்ற சிறிய நாடு இலங்கையினால் ஒன்றும் செய்ய முடியாது. சிறிது நாட்களில் வாலை ஆட்டியவாறே இலங்கையினால் செயற்றிட்டம் மீளவும் ஆரம்பித்து வைக்கப்பட்டது (Gbtimescom, 2019). இந்த செயற்றிட்டம் முடிந்தால் சுமார் $14 பில்லியன் அளவான முதலீடு இலங்கைக்கு கிடைப்பதுடன் 100,000 க்கும் அதிகமான இலங்கையரிற்கு வேலை வாய்ப்புகள் கிடைக்கும் சாத்தியம் உள்ளதாகவும் தெரிவிக்கப்படுகின்றது.

இந்தக் கட்டுரை எழுதும் போது (2019 பெப்ரவாரி) துறைமுக நகரத்தின் முதற் பகுதி வேலைகள் முடிவடைந்துள்ளன. அதாவது கடலில் மண் நிரப்பும் பணிகள் நிறைவடைந்துள்ளது, இனி மீதிக் கட்டுமான வேலைகள் ஆரம்பிக்கப்படவுள்ளது.

கடன் மேல் கடன்

அந்நியன் படத்தில் சார்லி சொல்லுவார், “ரெஸ்ட் எடுத்து களைத்துப் போய் மீளவும் ரெஸ்ட் எடுக்கின்றேன்” என்று. அதைப் போலத்தான் கடன் வேண்டி வேண்டி அதைக் கட்ட மீளவும் கடன் வாங்கியவனிடமே மீளவும் கடன் வாங்கும் கதையாகிவிட்டது இலங்கையின் நிலமை. 2018இன் இறுதியில் சுமார் $1 பில்லியன் கடனை சீனாவின் மக்கள் வங்கியிடம் இருந்து இலங்கை பெற்றுக் கொண்டது. இதற்கு முன்னர் 2017, IMF இடம் இருந்து ஏலவே ஒரு $1 பில்லியன் கடனை இலங்கை வாங்கிக் கொண்டதையும் இங்கே குறிப்பிட வேண்டும்.

தற்போது மீட்டர் வட்டிக்கு கடன் எடுத்தவன் நிலையில் இலங்கை கடன்களை சமாளிக்கத் திணறுகின்றது. தன்னை மீறிய நிலையில் EMI மூலம் பொருட்களை வாங்கும் எம்மைப் போன்ற பலரின் நிலையில்தான் தற்பொது இலங்கை உள்ளது.

இந்தியாவின் கவலை

இந்தியாவிற்கு மிக அருகில் வந்துவிட்ட சீனாவின் காரியத்தை இந்தியாவால் சீரணிக்க முடியவேயில்லை. இது பற்றி இலங்கை அரசிற்கும் இந்தியா தனது விசனத்தை அறிவித்ததாகக் கூறப்பட்டது. ஒரு தடவை சீனாவின் உளவுக் கப்பல் ஒன்றை இந்திய கடற்படை துரத்திச் செல்லவே அது கொழும்புத் துறைமுகத்தினுள் சென்று மறைந்து விட்டது என்றும் அரசல் புரசலான கதைகள் உலாவின (Ndtvcom, 2019).

சீனாவைத் தனது எல்லையின் ஒரத்திற்கே கூட்டி வந்த காரணத்தினாலேயே இந்தியா இராஜபக்‌ஷவை ஆட்சியில் இருந்து தூக்கிவிட்டதாக இராஜபக்சவே பொதுவில் குற்றம்சாட்டியிருந்தமையையும் இங்கே குறிப்பிட வேண்டும் (Indiatodayin, 2015). ஆயினும் இந்தியா இந்தக் குற்றச்சாட்டை அடியோடு அப்போது மறுத்து விட்டிருந்தது.

திருகோணமலை எண்ணெய்க் குதங்கள்

இந்திய அரசை சமாதானம் செய்ய இலங்கை அரசு உடனடியாக திருகோணமலையில் உள்ள எண்ணெய்க் குதங்களை இந்தியாவிற்கு வழங்க முன்வந்தது (Dailymirrorlk, 2019). ஆயினும் இந்த முயற்சி எந்தளவிற்கு வெற்றியடையும் என்று இப்போது சொல்ல முடியாது.

சீனாவின் மறுப்பு

சீனா தொடர்ந்து கடன் சுமை மூலம் இலங்கையின் போக்கை மாற்றியமைக்க முயல்கின்றது என்ற கூற்றை மறுத்து வருகின்றது. இலங்கையின் மொத்தக் கடன் தொகையில் சுமார் 10 வீதம் வரையே சீனா வழங்கிய கடன் உள்ளது என்றும் கூறியுள்ளது. மேலும் யுத்தத்தினால் பாதிக்கப்பட்டு உள்கட்டுமானத்தை மீள அமைக்க முடியாமல் திணறிய இலங்கைக்கு எந்தவித எதிர்பார்ப்பும் இல்லாமல் தாம் உதவி செய்ததாகவும் சீனாவின் இலங்கைத் தூதரகத்தின் பேச்சாளர் லுவோ சொங் தெரிவித்தார் (Www.ft.lk, 2019).

மேலும் ஹம்பாந்தோட்டைத் துறைமுகத்தின் பாதுகாப்பு இலங்கை அரசின் பொறுப்பிலேயே உள்ளது ஆகவே இங்கிருந்து நாங்கள் இராணுவ நடவடிக்கைகளைச் செய்வோம் என்பது வெறும் பொய்யான கூற்று என்றும் தெரிவித்திருந்தார். அத்துடன் ஹம்பாந்தோட்டைத் துறைமுகத்தின் வருமானம் இங்கை அரசுடனும் பகிரப்படும் என்றும் அறிவித்தார்.

 சீனாவின் கறுப்புப் பக்கம்

சீனாவின் பட்டுப் பாதை பற்றி நீங்கள் பள்ளிக் காலத்தில் படித்திருக்கலாம். பட்டுத் துணி தயாரிக்கும் முறையை பல நூற்றாண்டுகளாக சீனா இரகசியமாகப் பேணி வந்தது. பட்டுத் துணிகள் சீனாவில் தயாரிக்கப்பட்டு மத்திய ஆசியா, ஆபிரிக்கா மற்றும் ஐரோப்பா வரை எடுத்துச் செல்லப் பட்ட பாதையே பின்னாளில் பட்டுப் பாதை என்று அழைக்கப்பட்டது. கடல் மூலம் எடுத்துச் செல்லும் பாதையும் உள்ளது அதைப் போல நிலம் மூலம் எடுத்துச் செல்லப்பட்ட பாதையும் உள்ளது. இந்தப் பாதைகளினூடாக தனது பழைய போக்கு வரத்தை நிலைப்படுத்த சீனா தற்பொது முயன்று வருகின்றது. இதைச் சீனா “Belt and Road Initiative” (பெல்ட் அன் ரோட் இனிஷியேட்டிவ்) என்று அழைக்கின்றது.

இதன்படி பணத்தை வாரி இறைத்து பல நாடுகளைத் தன் வலையில் சீனா வீழ்த்தி வருகின்றது. இலங்கையைத் தவிர, டிஜிபோட்டி, டஜிகிஸ்தான், கிரிக்கிஸ்தான், லாவோஸ், மாலை தீவுகள், மொங்கோலியா, பாக்கிஸ்தான் மற்றும் மொன்டநீக்ரோ போன்ற நாடுகளும் கடுமையாகப் பாதிக்கப்பட்டுள்ளது. இவர்களின் கடன் சுமை சீனாவிடம் வாங்கிய அதிக வட்டிக் கடன்களினால் உயர்ந்து நிற்கின்றது (Qzcom, 2019). குறிப்பாக அதிக வட்டியுடன் கூடிய கடன் மற்றும் அதை ஏற்றுக் கொள்ளக்கூடிய உள்ளூர் அரசியல் வாதிகளுக்கு சலுகை, உள் குத்து நிறைந்த உடன்படிக்கைகள் என்று சீனாவின் திருகுதாளங்களை ஒரு பக்கம் நீட்டிக் கொண்டே செல்லலாம். இலங்கையைப் போல கடனைத் திருப்பித் தர முடியாமல் துறைமுகத்தைச் சீனாவிடம் குத்தகைக்கு விட்ட ஆபிரிக்க நாடும் உள்ளது என்பதை இங்கே குறிப்பிட வேண்டும்.

இதைவிட சீனாவின் செயற்றிட்டங்களில் பெரும்பாலும் தொழிலாளர்கள் சீனாவில் இருந்தே கொண்டுவரப்படுவர். இதன் காரணமாக இலங்கையில் பெருமளவிலான சீனர்களை நீங்கள் காண முடியும். கொழும்பின் சில பகுதிகளில் (குறிப்பாக கொள்ளுப்பிட்டி) தனி சீன மொழியில் பெயர் எழுதப்பட்ட கடைகளைக் கூடக் காணலாம். மேலும் சினிமாக்களில் சீனத் திரைப்படங்களைக் இரவு நேரச் சிறப்புக் காட்சியாக இவர்களுக்காக காட்டுவதையும் காணலாம். இந்தச் சமூக மாற்றத்தால் உள்ளூர் மொழிகள் புறக்கணிக்கப்படுவது மட்டுமல்ல, உள்ளூர் வாசிகளின் வேலை வாய்ப்புகளும் தட்டிப் பறிக்கப்படுகின்றன.

ஏலவே சில வணிகப் பொருட்களில் தமிழ் மொழியை நீக்கிவிட்டு சீன மொழியினைச் சேர்த்துவிட்டனர். பொன்டேரா நிறுவனத்தின் அங்கர் பட்டர் கூட இவ்வாறு சீனத்தைச் சேர்த்து தமிழைப் புறக்கணித்து விட்டனர் (Colombogazettecom, 2018).

தமிழ் புறக்கணிப்பு

சீனர்களும் தம் பாட்டிற்கு செயற்றிட்ட அறிவிப்பு பலகையில் தனிச் சீனம், சிங்களம் மற்றும் ஆங்கிலத்தில் பொறித்து விடுகின்றார்கள். ஏற்கனவே அடிபட்டு தவிக்கும் தமிழ் மொழிக்கு இவர்கள் இங்கே மேலும் சமாதி கட்டும் வேலையைச் சிறப்பாகச் செய்கின்றார்கள்.

முடிவுரை

எது என்னவாயினும் இங்கை இப்போது பெரும் கடன் சுமையில் உள்ளது. உலகில் உள்ள பலவீனமான பொருளாதாரங்களில் இலங்கையும் பட்டியல் இடப்பட்டுள்ளது. இந்த நிலையில் உள்ள இலங்கையில் சர்வதேச சக்திகள் தமது கைவரிசையைக் காட்ட முயல்வது சாதாரணமானது. வரலாற்றைத் திருப்பிப் பார்த்தால் இதைத்தான் உலக வல்லரசுகள் செய்துள்ளன. பலவீனமான நாடுகளை நன்றாக ஆட்டுவித்து மேலும் பலவீனமாக்கி தமது கைங்காரியங்களை நிறவேற்றுவதைத்தான் அவர்கள் காலம் காலமாகச் செய்துள்ளார்கள்.

குறிப்பாக இலங்கையின் கேந்திர முக்கியத்துவம் வாய்ந்த புவியியல் அமைவு இலங்கை பால் உலக வல்லரசுகளுக்கு விருப்பை ஏற்படுத்தும் காரணியாகும். குறிப்பாக இலங்கையின் திருகோணமலை, கொழும்பு, பருத்தித்துறை போன்ற துறைமுகளங்களை கையில் எடுத்துவிட்டால் தெற்காசியாவின் கடல் வழிப் போக்குவரத்தை முற்றிலுமாகக் கையில் வைத்திருக்கலாம். சீனாவின் பிரசன்னம் இப்போது இலங்கையில் யாராலும் தடுக்க முடியாத ஒரு பாரிய சத்தியாக உருவெடுத்திருக்கின்றது. இன்னும் ஒரு 20 முதல் 30 ஆண்டுகளினுள் சீனர்கள் இலங்கையை முழுக் கட்டுப்பாட்டினுள் கொண்டு வந்தாலும் ஆச்சரியப்படுவதற்கில்லை.

இலங்கையில் அண்மையில் நடைபெற்ற உள்ளூராட்சி சபைகளுக்கான தேர்தலில் மகிந்த இராஜபக்ஷவின் கட்சி பெரும் வெற்றியீட்டியது. 2020 இல் மகிந்த இராஜபக்‌ஷ அதிபர் பதவிக்கு மீளவும் போட்டியிட முடியாத வாறு மீளவும் அரசியல் யாப்பு மாற்றியமைக்கப்பட்டுள்ளது. ஆயினும் மகிந்தவின் தம்பிகளில் ஒருவர் மகிந்த சார்பாக போட்டியிடுவார் என்று எதிர் பார்க்கப்படுகின்றது. மகிந்தவின் குழு மீளவும் ஆட்சிக்கு வந்தால், கட்டுப்பாடில்லாமல் சீனா இலங்கையில் உலா வரும்.

2015 இல் மகிந்த இராஷபக்‌ஷவை மீள அதிபராக்க சீனா பல மில்லியன் டாலர்களைச் செலவு செய்தது. இம்முறை மீளவும் அதையே செய்யும் அதற்கு காரணம் ரணில் அரசு அமெரிக்க, இந்திய சார்பான அரசென்ற கொள்கையையே சீனா கொண்டுள்ளது. சீனா இலங்கையில் கால் ஊன்றினால் நீண்ட காலத்து நோக்கில் இந்தியாவின் கடலாதிக்கத்தை இது மிகவும் மோசமாகப் பாதிக்கும் அத்துடன் அமெரிக்காவும் தனது செல்வாக்கை தெற்காசியாவில் மெல்ல மெல்ல இழக்கும்.

உசாத்துணை

  • Indiatimes.com. 2018. The Economic Times. Online. 17 February 2019. Available from: https://economictimes.indiatimes.com/news/international/world-news/new-chinese-loan-may-further-plunge-sri-lanka-into-debt-trap/articleshow/65659719.cms
  • Dailymirrorlk. 2019. Dailymirrorlk. Online. 17 February 2019. Available from: http://www.dailymirror.lk/article/Govt-planning-to-hand-over-Trinco-oil-farm-to-India-Anura-155849.html
  • Indiatodayin. 2015. India Today. Online. 17 February 2019. Available from: https://www.indiatoday.in/world/story/sri-lanka-president-mahinda-rajapaksa-blames-india-raw-for-his-election-defeat-244216-2015-03-13
  • Ndtvcom. 2019. NDTVcom. Online. 17 February 2019. Available from: https://www.ndtv.com/india-news/china-ship-with-22-labs-spied-on-india-466101
  • Www.ft.lk. 2019. Wwwftlk. Online. 17 February 2019. Available from: http://www.ft.lk/front-page/No-debt-trap–China-says-its-loans-are-10-6–of-SL-s-total-and-over-60–concessionary/44-658460
  • Gbtimescom. 2019. Gbtimescom. Online. 17 February 2019. Available from: https://gbtimes.com/sri-lanka-resumes-14bn-port-city-project
  • Qzcom. 2019. Quartz. Online. 17 February 2019. Available from: https://qz.com/1223768/china-debt-trap-these-eight-countries-are-in-danger-of-debt-overloads-from-chinas-belt-and-road-plans/
  • Colombogazettecom. 2018. Colombo Gazette. Online. 17 February 2019. Available from: http://colombogazette.com/2018/09/08/fonterra-defends-having-chinese-and-not-tamil-on-anchor-butter-packs/

ஈழத்துச் சிறுகதைகள் – கின்டில் பதிப்பு

ஈழத்துச் சிறுகதைகள் இப்போது கின்டில் பதிப்பாகவும் உலகமெங்கும் கிடைக்கின்றது. உங்கள் கின்டில் சாதனத்திலோ இல்லை கின்டில் ரீடர் மூலம் கணனி வழியாகவோ, நகர் பேசி (அன்ரொயிட், ஐஓஎஸ் இயங்கு தளங்கள்) போன்றவற்றிலும் வாசிக்க முடியும்.

நூல் பற்றிய ஆசிரியர் குறிப்பு

2008 இல் ஒரு ஜென் கதையினை எமது பாணியில் சீ துஷ்டனே எனும் தலைப்பிட்டு எழுதினேன். அதை வாசித்தோர் பெருமளவில் அதற்கு வரவேற்புத் தெரிவிக்கவே மேலும் பல சிறுகதைகளைத் தொடர்ச்சியாக எழுதத்தொடங்கினேன். அவ்வரிசையில் அன்று முதல் இன்றுவரை எழுதிய சுமார் 11 சிறுகதைகளின் தொகுப்பே இந்த இ-புத்தகம்.

கதையின் மாந்தர்கள் பொதுவாக ஈழத்தவர்களாக இக்கதைகளில் சித்தரித்துள்ளேன் ஆயினும் கதையில் களம் ஈழத்தில் இருந்து ரொடன்டோ வரை விரிந்திருக்கும். இதன் காரணமாகவே தொகுப்பிற்கு “ஈழத்து சிறுகதைகள்’ என்று தலைப்பிட்டேன். கதையில் ஈழத்துதுப் பேச்சு வழக்கும், சிங்கள உரையாடல்களும் ஆங்காங்கே கலந்திருக்கும். ஆயினும் அவை கதை சார்ந்த உங்கள் புரிதலுக்கு எந்த ஊறும் ஏற்படுத்தாது என்று நம்புகின்றேன்.

These are the collection of short stories that I first wrote on my personal blog “Tamizh Valaipathivu”. Since many people seem to have enjoyed these stories, I thought of releasing them as a book. Here I’m sharing the book with the rest of the world.

I hope you like the book and the stories. The story is mostly written in the Jaffna Tamil slang, but I hope you can understand it without much difficulty.

உஙகளிடம் கின்டில் அன்லிமிட்டட் (Kindle Unlimitted) இருக்குமாயின் இந்தப் புத்தகத்தை இலவசமாக வாசிக்கலாம்.

நீங்கள் அமேசனை வெளிநாட்டில் இருந்து வாசிப்பவராயின் அமெரிக்கா, ஐக்கிய இராசியம் போன்ற தளங்களில் இருந்தும் பதிவிறக்கிக் கொள்ளலாம்.

கின்டில் இல்லாவிட்டால்

உங்களிடம் கின்டில் புத்தகங்களை படிக்கும் வசதி இல்லாவிட்டால் கூடப் பரவாயில்லை. நீங்கள் ஈழத்துச் சிறுகதைகள் புத்தகத்தினை இணையத்தில் pdf, epub வடிவங்களிலும் கம் ரோட் தளத்தில் இருந்து பதிவிறக்கிப் படிக்கலாம்.

தி ஏலியனிஸ்ட் – ஆங்கிலத் தொடர் விமர்சனம்

தி ஏலியனிஸ்ட் எனும் ஆங்கிலத் தொலைக்காட்சித் தொடரை நேற்று நெட்பிளிக்சில் பார்த்தேன். சாதாரணமாக எனக்கு உளவியல் சார் பரபரப்புத் (psycho thriller) தொடர்களைப் பார்க்க விருப்பம் அதிகம். அதுவும் தொடர் கொலை போன்ற கதைகளை விடாமல் பார்த்துவிடுவேன். இவ்வகையில் யூனாபொம்பர்டெக்ஸ்டர், லூதர் போன்ற தொலைக்காட்சித் தொடர்களை விரும்பிப் பார்த்தேன்.

இந்த அனைத்துத் தொலைக்காட்சித் தொடர்களிலும் இருந்து இந்த தொலைக்காட்சித் தொடர் மிகவும் வேறுபடக் காரணம் இந்தத் தொலைக்காட்சித் தொடர் நடப்பதாகக் காட்டப்படும் காலம் இற்றைக்கு சுமார் 130 வருடங்களுக்கு முன்னராக காலப் பகுதி. நிவ் யோர்க் நகரத்தில் 1900 இன் ஆரம்பங்களில் நடப்பது போன்று திரைக் காட்சிகள் அமைக்கப்பட்டுள்ளன. இக்காலத்தில் இருக்கும் நவீன நுட்பங்கள் மற்றும் profiling போன்ற எந்த வசதியும் இல்லாமலேயே கொலைகாரனைக் கண்டுபிடிக்க வேண்டிய தேவை இருக்கின்றது.

மேலும் இந்தத் தொலைக்காட்சித் தொடர் ஏலவே  1994 இல் வெளிவந்த ஒரு ஆங்கில நாவலைச் சார்ந்தே தயாரிக்கப்பட்டுள்ளது என்பதையும் இங்கே குறிப்பிட்டாக வேண்டும்.

கதைச் சுருக்கம் (No spoilers)

பாலியல் தொழிலில் ஈடுபடும் சிறுவர்களை மர்மமான முறையில் ஒருவன் கொடூரமாகக் கொலை செய்கின்றான். யார் எவர் எதற்காக இப்படிச் செய்கின்றார்கள் என்பதை அறிய புதிதாக வந்த காவல்துறை ஆணையாளர் முயல்கின்றார்.

உளவியலாளரும் அவர் குழுவும்
உளவியலாளரும் அவர் குழுவும்

இதேவேளை நகரில் ஒரு பிரசித்தி பெற்ற உளவியலாளர் ஒருவரும் இருக்கின்றார். உளவியலாளர் மேலும் சிலரின் உதவியுடன் பொலீசாரிற்கு மேலதிகமாகத் துப்புத் துலக்கத் தொடங்குகின்றார். என்ன எது நடந்தது என்பதெல்லாம் நான் சொல்லப் போவதில்லை அவற்றை நீங்களே பார்த்து அறிந்தி கொள்ளலாம்.

நிவ் யோர்க் நகரம்

தொடரிலே நிவ்யோர்க் நகரத்தை 1900 அளவில் இருந்த வாறே காட்டியுள்ளார்கள். காங்ஸ் ஒப் நிவ்யோர்க் திரைப்படத்தில் நீங்கள் பார்த்த அதே போன்ற கட்டிட அமைப்புகளை இந்தத் தொடரிலும் பாவித்துள்ளார்கள். அக்காலத்தின் அமெரிக்காவில்ல இருந்த பணக்கார ஏழை வித்தியாசம் எவ்ளவு மோசமானது என்பதையும் ஊழல் காவல்துறையில் எவ்வாறு வேரூன்றி இருந்தது என்பதையும் காட்டியுள்ளார்கள்.

18ம் நூற்றாண்டில் நிவ் யோர்க் நகரம்
18ம் நூற்றாண்டில் நிவ் யோர்க் நகரம்

காட்சிக்கு காட்சி அக்காலத்தில் நாங்கள் வாழ்வது போன்ற பிரமிப்பை ஏற்படுத்துகின்றார்கள். பெருமளவில் கணனி வரைகலையைப் பயன்படுத்தியிருந்தாலும் கூட எது உண்மை எது கணனி வரைகலை என்று புரியாதவாறு காட்சிகள் பிரமிப்பூட்டுவதாக இருந்தது.

உலகில் எந்த நகரமும் நிவ்யோர்க் அளவிற்கு திரைப்படங்களிலும், தொலைக்காட்சித் தொடர்களிலும் காட்டப்படவில்லை என்று நினைக்கின்றேன்.

உண்மைக் கதை?

இதில் வரும் சில பாத்திரங்களைப் பார்த்தபோது இது உண்மைக் கதையாக இருக்குமோ என்ற ஒரு எண்ணம் ஏற்படவே கூகளில் தட்டியதில் உண்மையாக இருந்த சில பாத்திரங்களைக் கோர்த்து அமைக்கப்பட்ட ஒரு கற்பனைக் காவியம் இது என் புரிந்துகொண்டேன்.

காவல்த்துறை ஆணையாளர்
காவல்த்துறை ஆணையாளர்

குறிப்பாக இக்கதையில் வரும் ரூஸ்வெல்ட் எனும் காவல்த்துறை ஆணையாளர் பின்னாளில் அமெரிக்காவின் அதிபராகியவர் என்பதைக் குறிப்பிடவேண்டும். இவ்வாறு சில உண்மைப் பாத்திரங்களைப் பாவித்துள்ளார்கள்.

நடிப்பு

நடிப்பு சிறப்பு அபத்தம் என்றெல்லாம் விமர்சனம் செய்யுமளவிற்கு நான் ஒன்றும் பெரிய துறைசார் அறிஞர் கிடையாது ஆயினும் ஒரு சராசரி இரசிகனாக டானியல் புருல், லூக் இவன்ஸ், டகோட்டா பான்னிங் ஆகியோரின் நடிப்பை இரசித்தேன்.

குறிப்பாக டகோட்டா பான்னிங் நடிப்பின் பின்னியெடுத்துவிட்டார். இந்தப் பாத்திரத்திற்காகவே பிறந்து வந்தாரோ என எண்ணுமளவிற்கு அவர் நடிப்பில் அசத்திவிட்டார்.

முடிவுரை

நீங்களும் உளவியல் சார் பரபர தொடர்களைப் பார்ப்பவரா? வரலாற்று சார் தொடர்களில் ஆர்வம் உள்ளவரா? அப்படியானால் உங்களுக்கும் இந்தத் தொடர் கட்டாயம் பிடிக்கும். தவறாமல் பார்த்து இரசியுங்கள்.

Stranger Things 2 – தமிழ் விமர்சனம்

கடந்த வருடம் (2016) Stranger Things முதலாம் பாகம் (Season 1) Netflix இல் வெளியாகி உலகம் முழுவதும் இரசிகர்கள் மத்தியில் பெரும் வரவேற்பைப் பெற்றது. அதன் இரண்டாம் பாகம் இந்த வருடம் ஹலோவீன் காலத்தில் வெளியாகியது.

ஸ்ரேஞ்சர் திங்க்ஸ் தொலைக்காட்சித் தொடரின் மிக முக்கியமான கருப்பொருளே 80 களில் அமைந்த கதைக் களம். Season 1 ஆனது 1983 இலும் Season 2 ஆனது 1984 இலும் நடப்பது போலவே கதைக் களம் அமைந்துள்ளது.

80களை மீட்ட வைக்கும்

80களில் ஏன் 90களில் சிறுவர்களாக இருந்தவர்கள் கூட இந்தத் தொடரைப் பார்க்கும் போது தங்கள் சிறுவயதில் செய்த பல காரியங்கள், பாவித்த பொருட்கள் என்பவற்றை இந்த திரைப்படத்தில் காணலாம். நகர்பேசி போன்ற புதிய தொடர்பாடல் முறைகள் இல்லாத காலத்தில் எமது வாழ்க்கை எப்படி அமைந்திருந்தது என்பதையும் இந்தக் கதை திரும்பிப் பார்க்க வைக்கின்றது.

தொலைக்காட்சித் தொடரெங்கும் 80களில் பிரபலமான ஆங்கிலப் பாடல்கள் மற்றும் திரைப்படங்களுக்கான reference நிறைந்திருக்கின்றன. Alien, Ghost Busters போன்ற திரைப்படங்களை உதாரணமாகக் கூறலாம்.

இதைவிட தொலைக்காட்சித் தொடர் முழுவதும் குறியீடுகள் நிறைந்துள்ளன. இவையனைத்திற்கும் காரணம் இந்தத் தொடரிற்கான கதையை எழுதும் டபர் சகோதர்கள் (Duffer brothers) 80களில் தாம் சிறுவர்களாக இருந்த போது அவர்கள் வாழ்க்கையில் செல்வாக்குச் செலுத்திய பல விடயங்களை இங்கே இலாவகமாகப் பயன்படுத்தியுள்ளமையே ஆகும்.

கதைச் சுருக்கம் (No Spoilders)

அமெரிக்காவில் உள்ள ஒரு சிறிய நகரான ஹோகிங்ஸ் இல் ஒரு அறிவியல் கூடம் அமைந்துள்ளது. இங்கிருந்து ஆராய்ச்சிகள் செய்து பூவுலகம் போல இன்னுமொரு பரிமாணத்தை ஒரு கதவு வழியாகத் திறந்து விடுகின்றார்கள். இன்னுமொரு பரிமாணத்தில் இருக்கும் இராட்சத மற்றும் கொடிய விலங்குகள் பூமியை அடைந்து விடுகின்றது.

பகுதி ஒன்று மற்றும் இரண்டு இந்த புதிய பரிமாணத்தின் கதவுகள் திறக்கப்பட்டதால் எற்படும் விளைவுகளைச் சுற்றியே அமைகின்றது.

கதையில் முக்கிய கதாபாத்திரங்களாக பாடசாலையில் கற்கும் நான்கு சிறுவர்கள் மற்றும் இயற்கையை விஞ்சிய சக்தியுடய ஒரு சிறுமியும் அமைந்துள்ளனர். கதையில் எனக்குப் பிடித்த பாத்திரம் டஸ்டின் எனும் சிறுவனே. அவன் வெகுளிப் பேச்சும் அட்டகாசமான பகிடிகளும் வாய்விட்டுச் சிரிக்க வைக்கும்.

பிரதான கதையில் இருந்து ஒரு கிளைக் கதையையும் இம்முறை அமைத்துள்ளார்கள். அனுமாஷ்ய சக்தி படைத்த எலெவென் (அல்லது ஜேன்) எனும் சிறுமி தனது பால்ய வயது நண்பியைத் தேடி ஹாக்கின்ஸ் நகரை விட்டுச் செல்கின்றார். அதைச் சுற்றி இந்தக் கிளைக்கதை அமைந்துள்ளது. இந்த அத்தியாயம் (episode 7) அவ்வளவாக சிறப்பாக அமையவில்லை என்று பலர் நினைத்தானுலும் Season Finale க்கான தளம் இங்கேயே அமைகின்றது என்பதை நாம் மறக்கக் கூடாது.

ஒவ்வொரு கதாபாத்திரமும் அழகாக அவர்களுக்குரிய ஆளுமையுடன் அருமையாகப் படைத்துள்ளார்கள். இதற்குமேல் நான் கதையைச் சொல்லப் போவதில்லை. 😉

விமர்சனம்

உங்களுக்கு பாகம் ஒன்று பிடித்திருந்தால் இந்தப் பாகம் உங்களிற்குப் பெரும்பாலும் பிடித்தே தீரும். நீங்கள் இதுவரை இந்தத் தொடரைப் பார்க்காதவர் எனில் காட்டாயம் பாருங்கள். உங்களை ஏமாற்றாது.

குறிப்பாக Mystery மற்றும் அறிவியல் புதினம் போன்ற துறையில் ஆர்வம் உள்ளவராயின் கட்டாயம் இந்தத் தொடர் உங்களைத் தொடலைக்காட்சியுடன் அப்படியே கட்டிப்போட்டுவிடும்.

Pirates of the Caribbean: Dead Men Tell No Tales திரை விமர்சனம்

Pirates of the Caribbean தொடரில் இதுவரை 4 திரைப்படங்கள் வெளிவந்துள்ளன. இந்த திரைப்படங்களில் முக்கியமான பாத்திரங்களாக இருந்தவை கப்டன் ஜக் ஸ்பரோவ் எனும் கடற் கொள்ளைக் காரன் மற்றும் வில் டேர்ணர் எனும் காப்டன் மற்றும் அவர் காதலி / மனைவி எலிசபெத் ஸ்வான். வில் டேர்ணராக ஒலண்டா புளூம் நடித்திருந்தார் (லேர்ட் ஒப் த ரிங்ஸ் திரைப்படத்தில் லெகலாஸ் பாத்திரம் ஏற்பவர் அவர்தான்.)

முதல் நான்கு பாகங்களின் மையக் கருவே வில் டேர்ணர் மற்றும் எலிசபெத் ஸ்வான் இடையிலான காதலே.

ஐந்தாம் திரைப்படம் Dead Men Tell No Tales

ஏலவே நான்கு திரைப்படங்களை எடுத்து வில் மற்றும் எலிசபெத் இடையிலான கதையை நன்கு கலந்து கரைத்து பரிமாறிவிட்டதால் இப்பொது கப்டன் ஜக் ஸ்பரோவின் வீர தீரச் செயல்களை மையமாகக் கொண்டு புதிய ஒரு தொடரை டிஸ்னிக் காரர்கள் ஆரம்பிக்கின்றார்கள் என்றே நினைக்கின்றேன்.

கதைச் சுருக்கம் (No Spoilers)

ஜக் ஸ்பரோவின் சிறுவயதில் ஒரு ஸ்பானிய கடற்படைக் கப்டனைத் தாக்கி ஒரு மந்திரங்கள் நிறைந்த இடத்தில் சிறை வைத்துவிடுகின்றான். சிறைப்பட்ட ஸ்பானிய கப்டன் சலசார் ஜக் ஸ்பரோவை பழிவாங்கத் துடிப்பதே கதை. மக்களுக்கு வில் டேர்ணர் மற்றும் எலிசபெத் இல்லாத கதை பிடிக்குமோ பிடிக்காதோ என்ற ஐயத்தினால் வில் டேர்ணரின் மகனையும் இந்தக் கதையில் சேர்த்துவிட்டிருக்கின்றார்கள்.

விமர்சனம்

திரைப்படம் சுமார் பரவாயில்லை இரகம். நீங்கள் ஏலவே இந்தத் தொடரைப் பார்ப்பவராயின் நிச்சயமாக இந்தப் பாகமும் உங்களுக்குப் பிடிக்கும். சிறப்பாக சொல்வதற்கு ஒன்றுமில்லை. ஆனால் கப்டன் ஜக் ஸ்பரோவின் விளையாட்டுகளுக்குக் குறைவில்லை என்று கூறிக் கொள்கின்றேன்.

இசை

இந்தத் தொடரில் உள்ள திரைப்படங்களின் மிகப் பெரிய பலம் ஹான் சிம்மர் எனப்படடும் இசையமைப்பாளரின் இசை. கீழே உள்ள பின்ணனி இசையைக் கேட்டுப்பாருங்கள்.. (இசையை முழுதாக இரசிக்க இரண்டு காதிலும் ஒலி வாங்கியை மாட்டிக் கேளுங்கள்)

இளையராஜா, இரகுமான் போல ஹொலிவூட்டில் சிங்கம் தனக்கென்று ஒரு இரசிகப் பட்டாளத்தையே வைத்துள்ளது. இந்தத் திரைப்படத்தில் அவர் இல்லாமை படத்தின் மிகப் பெரிய பலவீனம் என்றும் கூறலாம். இல்லை அவர் சிஷ்யன் அசத்தியிருக்கின்றார் என்றும் நீங்கள் கூறிக் கொள்ளலாம்.

முடிவுரை

திரைப்பட முடிவில் வில் டேர்ணர் மற்றும் எலிசபெத் வரும் காட்சியைப் பார்க்கும் போதுதான் அடடா.. இந்தத் திரைப்படத்தில் இவ்வளவு காலமும் இரசித்தது அந்தச் சோடியைத்தான் என்று உறைத்தது. அப்படியே 10 வயது குறைந்து போனது போல ஒர் உணர்வு.

என்னைப் பொறுத்தவரையில் ஜக் ஸ்பரோவின் நகைச்சுவைகள் மற்றும் வீர சாகசங்களை இரசிப்பவர்களுக்கு இந்தத் திரைப்படம் பிடிக்கும் மற்றவர்களுக்கு சுமார் இரகம்தான்.

The Dark Tower : தமிழ் திரை விமர்சனம்

The Dark Tower எனும் புத்தகத் தொடரை உலகப் புகழ் பெற்ற எழுத்தாளர் ஸ்டீபன் கிங் எழுதியிருந்தார். The Dark Tower : The Gunslinger எனும் பெயரில் 1982 இல் எழுதிய புத்தகத்தைத் தழுவியே இந்தத் திரைப்படம் எடுக்கப்பட்டுள்ளது. 1982 தொடக்கம் 2012 வரை மொத்தம் ஒன்பது புத்தகங்கள் இந்தத் தொடரில் உள்ளன.

புத்தகம் Vs திரைப்பகம்

ஸ்டீபன் கிங் தான் எழுதிய புத்தகங்களில் இதுதான் மிகவும் தனக்குப் பிடித்தமானதும் பிரமாண்டமானதும் என்று குறிப்பிட்டிருக்கின்றார். ஆனாலும் புத்தகம் இரசிகர்கள் மத்தியில் பெற்ற வெற்றியோடு ஒப்பிடும் போது திரைப்பம் அவ்வளவாக சோபிக்கவில்லை.

ஒரு புத்தகத்தைத் திரைப்படமாக்கும் போது எப்போதுமே அது அந்தப் புத்தக இரசிகர்களைத் திருப்திப்படுத்தியதாக வரலாறில்லை. ஆனால் இந்த முறை புத்தகப் பிரியர்களை மட்டுமல்ல சாமான்ய இரசிகர்களையும் இந்தத் திரைப்படம் அவ்வளவாகக் கவரவில்லை.

கதைச் சுருக்கம் (No Spoilers)

அமெரிக்க நகரில் வாழும் ஒரு சிறுவன் அடிக்கடி விபரீதமாக மனிதர்களையும் இடங்களையும் தனது கனவில் காண்கின்றான். தனது கனவில் கண்டவற்றை சித்திரமாக (Sketches) கீறி வைத்துக் கொள்கின்றான்.

இவன் கனவுகளில் காண்பவற்றை தனது பெற்றோரிடம் கூறியதும் இவன் ஏதோ பைத்தியம் பிடித்து உளறத் தொடங்கிவிட்டான் என்று எண்ணும் நிலமைக்கு சென்றுவிடுகின்றது.

யாரும் தன்னை நம்பாத போது கனவில் கண்ட நபர்களைத் தேடி சிறுவர் தனது பயணத்தை ஆரம்பிக்கின்றான். பயணத்தில் அவன் காணும் வீர தீரச் செயல்களே கதையின் மிகுதி.

ஏன் திரைப்படம் சோபிக்கவில்லை?

இந்தத் திரைப்படத்தில் வரும் காட்சிகளும் கதையும் ஏலவே பல திரைப்படங்களில் போட்டு நன்று அலசிக் கழுவிக் காயப் போட்டுவிட்டார்கள். அதனால் இந்தத் திரைப்படத்தைப் பார்க்கும் போது புதியதாய் ஒரு fantasy திரைப்படத்தைப் பார்க்கும் உணர்வு ஏற்படவில்லை.

மேலும் திரைப்படத்திற்காக புத்தகத்தின் கதையில் பெருமளவை வெட்டிவிட்டதனால் கதையும் சோபிக்கவில்லை.

பலரும் திரைப்படத்தைப் பற்றி பல்வேறு விதமாகப் பேசியபோதும் குறிப்பாக திரைக்கதை எழுதிய அகிவா கோல்ட்ஸ்மன் பற்றி பலவாறு பேசியபோதும் அவை அனைத்தையும் ஸ்டீபன் கிங் மறுத்துள்ளார். அடுத்த பாகம் எடுக்கப்பட்டால் அதை R rated திரைப்படமாக எடுக்க வேண்டும் என்றும் வேண்டியுள்ளார்.

அடுத்த பாகம்?

திரைப்படம் எதிர்பார்த்த அளவு செல்லாத காரணத்தினால் அடுத்தபாகம் எடுக்கும் வேலைகள் ஸ்தம்பிதமாகியுள்ளதாகத் தெரிகின்றது. ஆயினும் Dark Tower கருவை மையமாகக் கொண்டு தொலைக்காட்சித் தொடர் ஒன்று தயாராவதாகத் தெரிகின்றது. அதாவது தடைப்படாமல் வெளிவரும் என்று நம்புவோம்.

மேலும் இந்தக் கதையைக் களமாகக் கொண்டு ஒரு காமிக்சும் வெளிவந்துள்ளது. அதனை கொழும்பில் இம்முறை நடைபெற்ற பிக் பாட் வூல்ப் புத்தகக் கண்காட்சியில் வாங்கினேன். வாசித்து முடிந்ததும் அதற்கான விமர்சனத்தையும் எழுதிவிடுகின்றேன். ஆனால் சற்றுக் காலம் பொறுத்திருக்க வேண்டும்.

வழமை போல நீங்கள் fantasy மற்றும் wild west இரகத் திரைப்படங்களைப் பார்ப்பவராயின் இந்தத் திரைப்படம் உங்களை கவரலாம். ஆயினும் திரைக்கதை மிகவும் பலவீனமாக உள்ளதையும் கணக்கில் கொள்ளுங்கள்.

War for the Planet of the Apes – தமிழ் விமர்சனம்

தலைப்பிற்கேற்றவாறு ஒரு யுத்தம் சம்பந்தமான திரைப்படம் ஆரம்பிக்கும் போது எப்படி ஆரம்பிக்குமோ அது போலவே இந்தத் திரைப்படமும் ஆரம்பிக்கின்றது. பச்சைப் பசேலென அமைந்த அடர் காடுகளின் நடுவே படை வீரர்கள் பச்சைச் சீருடையுடன் துப்பாக்கிகளை உயர்த்தியவாறே மெல்ல மெல்ல நகர்கின்றனர்.

முன்னால் சிறிது தூரத்தில் ஒரு குரங்குளின் பாசறை தெரிகின்றது. மனிதர்களின் இராணுவம் மெல்ல மெல்ல நகர்ந்து பாசறையை சுற்றி வளைத்த பின்னர் தனது காட்டுத் தனமான தாக்குதலைத் தொடங்குகின்றது. எதிர்பாரா விதமாகத் திரும்பும் சண்டையில் குரங்குகள் வெற்றியடைகின்றன. பிடிக்கப்பட்ட மனித இராணுவ வீரர்களைக் காண குரங்குகளின் தலைவன் சீசர் வருகின்றார்.

Planet of the Apes

இந்தப் பிளனட் ஓப் தி ஏப்ஸ் தொடர் திரைப்படம், நாவல், கொமிக்ஸ் மற்றுத் தொலைக்காட்டிச் தொடர் என்று பல வட்டங்களை சுற்றி வந்துள்ளது. இவை அனைத்திற்கும் மூலம் 1963இல் வெளி வந்த பிரஞ்சு நாவலான La Planète des Singes இல் இருந்தே ஆரம்பித்துள்ளது. இந்த நாவல் பிற்காலத்தில் ஆங்கிலத்தில் Planet of the Apes என்று அமெரிக்காவிலும் Monkey Planet என்ற பெயரில் ஐக்கிய இராச்சியத்திலும் வெளியிடப்பட்டுள்ளது.

இதன் பின்னர் 1968 முதல் 1973 வரை Planet of the Apes எனும் கருவை மையமாக வைத்து ஐந்து திரைப்படங்கள் வெளி வந்தன.

பின்னர் Planet of the Apes (1974) மற்றும் Return to the Planet of the Apes (1975–1976) என்று இரண்டு தொலைக்காட்சித் தொடர்களும் எடுக்கப்பட்டன.

பணம் பார்க்கலாம் என்று தெரிந்தால் திரைப்படத் தயாரிப்பாளர்கள் சும்மா இருப்பார்களா? 😉 அத்துடன் விட்டு விடாமல் 2001 இல் Planet of the Apes எனும் பெயரில் மீளவும் ஒரு திரைப்படத்தை எடுத்தனர். இதைத் தொடர்ந்து சில கணனி விளையாட்டுக்களும் அக்காலத்தில் இந்தக் கருவை மையமாக வைத்து வெளியிடப்பட்டது.

Reboot series

பொதுவாக ரீமேக் மற்றும் ரீபூட் செய்யப்படும் திரைப்படங்கள் அவ்வளவாக சோபிப்பதில்லை. ஆனால் இந்த தொடரில் செய்யப்பட்ட திரைப்படங்கள் மூன்றுமே மிகவும் அருமையாக வந்துள்ளது. இந்தத் தொடரில் இறுதியானதும் மூன்றாவதுமான திரைப்படம் பற்றிய விமர்சனமே இது.

விமர்சனம்

மனிதர்களைப் போல (அல்லது அவர்களை விட சிறிதே அதிகமாக) குரங்குள் புத்திசாதூர்யம் படைத்தவர்களாக மாறிய உலகில் மனிதர்கள் மற்றும் குரங்குகள் இடையே நடக்கும் யுத்தம் / போட்டி பற்றியதே இந்த தொடர்களின் சாரம்.

இந்தப் பாகத்தில் குரங்குகளின் தலைவர் சீசரின் குடும்பத்தை மனிதர்கள் சிதைத்துவிடவே அதற்குக் காரணமான இராணுவத் தலைவர் கேணலைத் தேடி குரங்குகளின் தலைவர் சீசர் தன் பயணத்தை ஆரம்பிக்கின்றார். உயிரிற்கு மேலான தலைவரைத் தனியே அனுப்புவதை விரும்பாத சீசரின் போராட்டக் குணம் கொண்ட சில நண்பர்களும் சீசருடன் தமது பயணத்தை ஆரம்பிக்கின்றனர்.

இந்தக் காட்சிகள் அனைத்துமே நாம் பார்த்த வேறு வேறு திரைப்படங்களை ஞாபகப்படுத்துவதாக இருந்தாலும் இந்தத் திரைப்படக் காட்சிகள் நம்மை அப்படியே பிணைத்துப் போட்டுவிடுகின்றன.

CGI (கணனி கிராபிக்ஸ்) திரைப்படம் முழுதும் பாவிக்கப்பட்டிருந்தாலும், காடுகளும், பனி மலைகளும் மொத்தத்தில் இயற்கை திரைப்படம் முழுவதும் நிறைந்திருந்து பார்ப்போரை நிஜமாக களத்திற்கே அழைத்துச் சென்றுவிடுகின்றது.

Bad Ape

படத்தில் சீசர் மற்றும் அவரது குழுவுடன் இடையில் இணைந்து கொள்ளும் ஒரு குரங்குதான் பாட் ஏப் எனப்படும் ஒரு குரங்கு. மிருகக் காட்சிசாலையில் இருந்து தப்பித்த இந்தக் குரங்கு திரைப்படத்தில் மெலிதான நகைச்சுவையைக் கொண்டுவர பாவிக்கப்பட்டுள்ளது.

சீசர் போல இந்தக் குரங்கும் ஆங்கிலத்தைப் பேசுகின்றது. பிரியாணிக்கு அளவாக உப்புப் போடுவது போல திரைப்படத்தின் போக்கை சிதைக்காமல் பாட் ஏப் எனும் இந்தப் பாத்திரம் மூலம் மெலிதான நகைச்சுவைக் காட்சிகளை வடிவமைத்துள்ளனர். படம் முடியும் போது பாட் ஏப் எமது மனதில் ஒரு இடம் பிடித்திருக்கும்.

மெதுவாக நகரும் திரைக்கதை

திரைப்படம் மிகவும் மெதுவாகவே நகர்கின்றது என்ற ஒரு குற்றச்சாட்டு இந்தத் திரைப்படத்தைப் பார்த்த சிலரிடம் உள்ளது. ஆனாலும் இந்தத் திரைப்படத்தில் வெறும் சண்டைக் காட்சிகளை மட்டும் காட்டியிருந்தால் இவ்வளவு தாக்கத்தை மக்கள் மத்தியில் ஏற்படுத்தியிருக்காது என்பது என் எண்ணம்.

மனிதர்களின் ஆள் மனதில் இருக்கும் வன்மம், சுயநலவாதம், எல்லையற்ற பழிவாங்கும் எண்ணம் என்பவற்றை இத்திரைப்படத்தில் அருமையாகக் காட்டியுள்ளார்கள். மனிதர்கள் போல சிந்திக்க ஆரம்பிக்கும் குரங்குகளுக்கும் இந்த இயல்புகள் மெல்லத் தொற்றுவதைத் திரைப்படத்தில் அழகாகக் காட்டியுள்ளார்கள்.

மேலும் யுத்தம் ஒன்று நடக்கும் போது மனிதர்கள் எவ்வாறான கொடூரர்களாக மாறுவார்கள் என்பதையும் காட்டுகின்றது. பெரும் யுத்தத்தைக் கடந்து வந்த எமது சந்ததியினர் இதனைப் பல இடங்களில் எம்முடன் பொருத்திப் பார்ப்பதைத் தவிர்க்க முடியாது.

எந்த யுத்தத்திலும் கோடாரிக் காம்புகளிற்குக் குறைவிருக்காது. தன் சொந்த இனத்தையே காட்டிக் கொடுக்கும் சந்தர்ப்பவாதிகளை வரலாற்றின் ஊடு கண்டிருக்கின்றோம். புத்தி சாதூர்யம் கூடியதும் மனிதர்கள் போல குரங்குகளும் இவ்வாறு இருப்பதைக் காணும் போது அடச் சே! என்று எண்ணத் தோன்றியது.

இவையனைத்தையும் எட்டவே அல்லது திரையில் விபரிக்க முனைந்ததாலேயே இந்தத் திரைக்கதை சற்று மெதுவாக நகர்வதாக நான் எண்ணுகின்றேன்.

முடிவு

அக்சன் மற்றும் கதை உள்ள திரைப்படங்களை பார்க்க விரும்புபவராயின் கட்டாயம் இந்தத் திரைப்படத்தை நீங்களும் பாருங்கள். உங்களை இந்தத் திரைப்படம் ஏமாற்றாது.

Ajin: Demi-Human – தமிழ் விமர்சனம்

அண்மையில் காசில்வேனியா பார்த்த பின்னர் இன்னுமொரு அனிம் தொடரை நெட்பிளிக்சில் பார்க்கலாம் என்று எனத் தேடியபோது கண்ணில் பட்ட தொடர்தான், அஜின் – டெமி ஹியூமன் எனும் தொடர்.

புத்தகம் & மற்றும் திரைப்படங்கள்

இந்தத் தொடர் உண்மையிலேயே முதலில் அனிம் புத்தகங்களாக 2015 காலப்பகுதியில் வெளி வந்துள்ளன. பின்னர் அதை சார்ந்து இரண்டு திரைப்படங்களை எடுத்துள்ளனர். திரைப்படங்கள் எடுத்தவர்கள் அத்துடன் நிறுத்தவில்லை, தொலைக்காட்சித் தொடர்களையும் எடுத்துத் தள்ளியுள்ளனர்.

இந்த ஜப்பான் கார்ட்டூன்களுக்கு இருக்கும் பிரமாண்டமான சந்தை உண்மையிலேயே பிரமிக்க வைக்கின்றது.

கதை சிறு அறிமுகம் (No Spoilers)

சில மனிதர்கள் இறவா வரமுடையவர்களாக இருக்கின்றார்கள். அவர்களில் பலர் தாமும் மனிதர்களுடன் இணைந்து வாழ விரும்பினாலும் ஜப்பான், அமெரிக்கா போன்ற அரசுகள் அவர்களைப் பிடித்து அவர்களை வைத்து மனிதத்திற்கு விரோதமான ஆராய்ச்சிகளைச் செய்கின்றது. இதனால் கோவமடையும் அஜின்கள் ஜப்பான் அரசிற்கு எதிராக எடுக்கும் நடவடிக்கைகளை மையமாகக் கொண்டு கதையைப் பின்னியுள்ளார்கள்.

புதிய திரைப்படம்

தொடரின் மூன்றாம் பாகம் வெளிவருமா என்று தெரியவில்லை ஆனால் புதியதாக 2017இல் தொலைக்காட்சித் தொடரின் அதே பெயரில் ஒரு ஜப்பானியத் திரைப்படம் வெளியாகியுள்ளதாகத் தெரிகின்றது. விரைவில் அதைப் பதிவிறக்கிப் பார்க்க வேண்டும்.

விமர்சனம்

நான் அனிம் தொடர்களுக்கு புதியவன் என்பதனால் இதைப் பற்றி பெரியளவில் என்னால் கருத்துக் கூற முடியாவிட்டாலும் பொதுவாக மிகவும் இரசித்துப் பார்த்தேன். குறிப்பாக IBM எனும் மனிதப்போலி திடப் பொருட்கள் மிகவும் அருமையாக காட்டியிருந்தார்கள்.

பாத்திரங்கள் மற்றும் கதை வடிவமைப்பை மிகவும் அழகாகச் செய்துள்ளார்கள். ஒரு வாரத்தினுள்ளேயே நான் மொத்த இரண்டு பாகங்களையும் பார்த்து முடித்துவிட்டேன். Fantasy மற்றும் Sci-Fi வகையாறாத் தொலைக்காட்சித்தொடர்கள் பிடிக்குமென்றால் கட்டாயம் இந்த Ajin எனும் அனிம் தொடரையும் பார்த்துவிடுங்கள்.

விரைவில் இன்னுமொரு அனிம் தொடரைப் பார்க்கவேண்டும் என்று ஆர்வமாக உள்ளது. பார்ப்போம் 😉

Castlevania – தமிழ் விமர்சனம்

அனிம் தொலைக்காட்சித் தொடர்களில் அத்தனை ஆர்வம் எனக்கு இல்லை. ஆயினும் அண்மையில் நெட்பிளிக்சில் என்ன பார்க்கலாம் என்று யோசித்தபோது இந்த காசில்வேனியா எனும் அனிம் தொடர் எனது கண்ணில் பட்டது. சரி என்னதான் இருக்கின்றது பார்த்துவிடுவோமே என்று முதலாவது அத்தியாயம் பார்த்ததும் அடடா என்று அந்தத் தொடருடன் ஒட்டிக்கொண்டேன்.

காசில்வேனியாத் தொடரின் கதை பெல்மொன்ட் எனும் குடும்ப வாரிசுகளுக்கும் இரத்தக்காட்டேரி (ட்ரகுலா)விற்கும் இடையில் நடக்கும் சண்டையை மையமாக வைத்தே தயாரித்துள்ளார்கள். இது வெறும் அனிம் தொடர் மட்டுமல்ல, இதன் பின்னால் பல வீடியோ விளையாட்டுக்கள் புத்தகங்கள் போன்றனவும் வெளியாகியுள்ளன.

முதல் நான்கு அத்தியாயங்களும் அருமையாக இருக்கின்றது ஆயினும் எதிர்காலத்தில் இது எவ்வாறு அமையப் போகின்றது என்பதை இரண்டாம் பாகம் வெளியாகியதும்தான் நாங்கள் தீர்மானிக்கலாம்.

உங்களுக்கு fantacy வகையறாத் திரைப்படங்கள், தொலைக்காட்சித் தொடர்கள் பிடிக்குமென்றால் கட்டாயம் இந்தத் தொடரைப் பாருங்கள். சிறுவர்களுடன் பார்க்க அவ்வளவாக உவந்ததில்லை. இரத்தமும் சதையும் தெறிக்கும் காட்சிகள் தொடரெங்கும் நிறைந்திருக்கின்றன.

இந்தத் தொடரில் வெறும் நான்கு அத்தியாயங்கள் மட்டுமே உள்ளன. இரண்டாம் பாகம் விரைவில் வெளிவர உள்ளது என்பது மகிழ்ச்சியான விடயம். இரண்டாம் பாகத்தில் எட்டு அத்தியாயங்கள் இருக்கும் என்றும் அறவிக்கப்பட்டுள்ளது.

13 Reasons why – விமர்சனம்

Netflix நிறுவனத்தின் 13 Reasons why எனும் தொலைக்காட்சித் தொடரைக் காணக் கிடைத்தது. நீண்ட நாட்களின் பின்னர் இப்படி ஒரு தொடரைப் பார்த்ததும் அப்படியே அசந்து போனேன்.

Theyre-from-13-Reasons-Why

பாடசாலையில் மாணவர்களின் இன்றய நிலை மற்றும் ஒருத்தரை ஒருத்தர் எவ்வாறு மனதைத் துன்புறுத்தும் விதமாக எள்ளி நகையாடுகின்றார்கள் என்பதைப் பற்றிப் பேசுகின்றது. அதைவிட இவ்வாறு நடப்பதன் விளைவு என்ன என்பதையும் காட்டுகின்றார்கள். தொலைக்காட்சித் தொடரின் 13 அங்கங்களையும் பார்த்த்த பின்னர் மனதை மிகவும் பாதித்த தொடராக இது இருந்தது என்றால் மிகையாகாது.

ஹன்னா பேக்கரின் கதை

3270

பதின்ம வயதைச் சேர்ந்த ஹன்னா பேக்கர் அமெரிக்காவின் உயர் பள்ளியொன்றில் கல்விபயில நுழைகின்றார். அந்த வயதில் இருக்கும் அன்பிற்கான ஏக்கம், காதல், நட்பு போன்றவற்றைக் கடந்து போகின்றார். இந்த நேரத்தில் இவற்றைக் கடக்கும் போது ஏற்பட்ட விளைவுகள் அவரை தற்கொலைக்குத் தூண்டி விடுகின்றது. தற்கொலை செய்ய முன்னர் சிறிய வயதில் நாங்கள் பயன்படுத்திய காசட் பீஸ் இல் தான் ஏன் தற்கொலை செய்தேன் என்று ஒலிப் பதிவு செய்து விட்டுத் தற்கொலை செய்து கொள்கின்றார். தற்கொலை செய்ய முன்னர் அந்த ஒலிப் பதிவுகள் தான் இறக்கக் காரணமாக இருந்தவர்களிடம் சென்றடையவும் வழி சமைகின்றார். இந்த ஒலிப் பதிவுகளைக் கேட்கும் நபர்களின் நிலை என்ன? இந்த ஒலிப்பதிவு பற்றி அவர் பெற்றோரிற்குத் தெரிந்தாதா? பள்ளி நிர்வாகம் என்ன செய்தது போன்ற விடயங்களை இந்தத் தொடர் அலசுகின்றது.

தற்கொலை

இந்தத் தொடரைப் பார்த்த போது தற்கொலைகளைத் தடுக்க நாம் கட்டாயம் முயற்சிக்க வேண்டும் என்பதும் அதை ஒரு முக்கிய பிரச்சனையாக நாங்கள் பார்ப்பதில்லை என்பதும் எனக்கு உறைத்தது.

பதின்ம வயதுகள் வாழ்க்கையில் மிகவும் ஒரு மிக முக்கியமான தருணம். அந்த வயதில் பெரும் மன அழுத்தத்தை எதிர்கொள்ள வேண்டி வரும். குறிப்பாக அடுத்து உயல் கல்விக்காக தயார் செய்ய வேண்டிய நிலை, பெற்றோரின் பண நெருக்கடி என்று பல விடயங்கள் உள்ளன. இந்த மன அழுத்தத்தை எங்கனம் எதிர்கொள்வதென்பது சிலரிற்குத் தெரிவதில்லை. இதன் காரணமாக மன அழுத்தத்தின் உச்சத்தில் தற்கொலை செய்து கொள்கின்றனர்.

பெற்றோர் குறிப்பாக தமது குளந்தைகளோடு மனம் விட்டுப் பேச வேண்டும் அவர்களுடம் நேரம் செலவு செய்ய வேண்டும் அத்துடன் அவர்களை வெறும் சிறுவர்களாகப் பார்க்காமல் அவர்கள் உலகத்தில் என்ன நடக்கின்றது என்பதனையும் அறிய வேண்டும். தனியே உங்கள் தொழிலை மட்டும் பார்த்துக் கொண்டு அடுத்த பதவியுயர்வை பெற்றுவிட்டேன் என்று பெருமைப் படுவதில் என்ன இருக்கின்றது? அனைத்தும் இருந்தும் பிள்ளைகள் கூடவே இல்லை என்றால் அதில் என்ன இன்பம் இருக்கின்றது? சிந்தியுங்கள் பெற்றோர்களே!

தொடர் பற்றிய குறைகள்

தொடர் ஒரு பக்கத்தில் பெரும் வரவேற்பைப் பெற்றாலும் மறு பக்கத்தில் பெரும் எதிர்ப்புகளையும் சந்தித்தது. அதாவுது தற்கொலை செய்த பின்னர் ஒலிப்பதிவுகள் மூலம் பழி வாங்குவதைப் போல காட்டுவது ஒரு பிழையான முன்னுதாரணம் என்றும் இதனை நாளை மேலும் பல சிறார்கள் முயற்சிக்கலாம் என்றும் கூறி தமது கண்டனங்களைச் சிலர் தெரிவித்தனர்.

தற்கொலை செய்யும் காட்சி மற்றும் வன்புணர்வு போன்ற காட்சிகள் மிகவும் நீளமாக காட்சிப்படுத்தி பார்ப்பவரை மிகவும் சங்கடமாக உணர வைப்பதாகவும் கூறி தமது வெறுப்புகளை மேலும் சிலர் வெளியிட்டனர்.

நியூசிலாந்து அரசு இந்தத் தொடரை 18 வயதிற்குக் குறைந்தயாரும் பெற்றோர் இல்லாமல் பார்க்கக்கூடாது என்று கட்டளையிட்டுள்ளது.

ஆனால் நான் நினைக்கின்றேன் இந்தத் தொடர் சமூகத்தில் உள்ள ஒரு முக்கியமான பிரச்சனையை நிதானமாக ஆராய்ந்துள்ளது. இப்படியான காட்சிகள் இருந்தமையினால்தான் இந்தத் தொடர்பற்றியும் அதில் பேசப்பட்ட விடயங்கள் பற்றியும் இத்தனை தூரம் பல ஊடங்களிலும் பேசப்பட்டது என்பது என் கணிப்பு.

யார் பார்க்கலாம்?

இந்தத் தொடரில் வரும் காட்சிகள் சிலது சிறுவர்களுக்கு பொருத்தமானது என்று நினைக்கவில்லை. ஆயினும் 17 வயதிற்கு மேற்பட்டவர்கள் கட்டாயம் பெற்றோருடன் சேர்ந்து இதைப் பார்க்கலாம் பார்க்க வேண்டும் என்பது என் எண்ணம். இதைப் பார்க்கும் போது முடிந்தால் அவர்கள் மனதில் உள்ள குறைகளை கேட்டறிய உங்களுக்கு வாய்ப்புக் கிடைக்கக்கூடும்.

Season 2

இரண்டாம் பாகம் இதன் தொடர்ச்சியாக வெளிவர இருப்பதாகக் கூறப்படுகின்றது. இது பற்றிய மேலதிக தகவல்களை இங்கே படிக்கலாம். ஆயினும் முதல் பாகம் அளவிற்கு இது இருக்குமா என்றால் இல்லை என்றுதான் நான் கூறுவேன். இரண்டாம் பாகம் பெருமளவில் நீதிமன்றை சுற்றியமையும் என்பது என் கணிப்பு.

தமிழில் ஏதாவது எழுதும் ஆர்வத்தில் எழுதும் தமிழ் வலைப்பதிவு இது