அண்மையில் பறந்து போ எனும் திரைப்படத்தை ஹாட் ஸ்டார் தளத்தில் பார்த்தேன். இயக்குனர் ராம் அவர்களின் திரைப்படம் என்று ஒரே காரணத்தினாலேயே இந்த திரைப்படத்தை நான் உட்கார்ந்து பார்க்கலாம் என்று முடிவெடுத்தேன். பேரன்பு, தரமணி மற்றும் தங்க மீன்கள் போன்ற திரைப்படங்கள் என்றும் என் இதயத்திற்கு அருகாமையான திரைப்படங்கள்.
அந்த வரிசையில் இந்தத் திரைப்படமும் இருக்கும் என்று பார்த்தால் வெறும் எரிச்சல்தான் இறுதியில் எஞ்சியது. நவீன உலகில் பெற்றோர்களின் தவிப்பு போராட்டம் மற்றும் பயணங்களும் அதன் வழி கிட்டும் வாழ்க்கைப் பாடங்களும் என்று கதை நீள்கின்றது. என் நட்பு வட்டத்தில் சிலர் இந்த திரைப்படத்தை சிலாகித்துப் பேசியிருந்தனர் ஆனால் திரைப்படத்தைப் பார்க்கும் போது பாத்திரங்களும் அவர்கள் ஓயாமல் பேசுவதும் மிகவுமே அலுப்புத்தட்டுவது போல ஆகிவிட்டிருந்தது.
இயக்குனர் இராம் அவர்களே இந்தத்திரைப்படத்தில் நான் கருத்தொண்டும் சொல்ல விரும்பவில்லை என்று கூறியிருந்தார். ஆயினும் ஐயோ சாமி படம் முழுக்க எப்படி குளந்தை வளர்ப்பு அமைய வேண்டும் என்று பாடம் எடுப்பது போலவே இருந்தது. பாத்திரங்கள் எதுவும் ஒட்டவேயில்லை வெறும் அதிகப்பிரசங்கித்தனமாக இருந்தது.
பறந்துபோ திரைப்படத்தின் மூலம் ஒரே ஓட்டமாக இருக்காமல் சற்றே ஓய்வெடுத்து வாழ்க்கையில் சில பாகங்களை ரசியுங்கள் என்று கூற வருகின்றார் என்று நினைக்கின்றேன்.
பறந்து போ – பொறுமையுடன் உட்கார்ந்து பார்க்க முடிந்தால் பாருங்கள்.
