இந்தியா சுற்றிய தமிழ்ப் பாடல்

இசைஞாணி இளையராஜா 80களில் கொடுத்த ஒரு மெகா ஹிட் பாடல்தான் சங்கத்தில் பாடாத கவிதை. 84இல் வெளியான இந்தப்பாடல் கிட்டத்தட்ட என்னுடைய வயதை உடையது. காலத்தைத் தாண்டி இன்றும் கேட்போர் மனதைக்கொள்ளை கொள்ளும் இந்தப் பாடல் இந்தியா முழுவதும் பல மொழிகளில் பாடப்பட்டதை அறிவீர்களா.

முதலில் தமிழ்ப் பாடல் சங்கத்தில் பாடாத கவிதை
படம்: ஆட்டோ ராஜா

பாலு மகேந்திரா இசையால் மயங்கி இதை தனது மலையாளப்படத்தில் பாவிக்கின்றார். தும்பி வா என்று இன்றுவரை பலர் இந்தப்பாடலை சிலாகித்துக் கேட்பதைக் கேட்கலாம். அண்மையில் நீ தான் என் பொன்வசந்தம் திரைப்படப் பாடல்கள் வெளியீட்டு விழாவிலும் பாலுமகேந்திராவிடம் ராஜாவின் பிடித்த பாடல் ஒன்றைச் சொல்லுமாறு கேட்டதும் இந்தப்பாடலைத்தான் சொன்னார். அழகான மொழி மலையாளத்தில் அருமையாக ஒலிக்கின்றது ஜானகி அவர்களின் குரல். தமிழிற்கு முன்னர் மலையாளத்தில் இந்தப்பாடல் வெளியானது.

தெலுங்கில் ஆகாசம் ஏனாடிடோ என்று ஒலிக்கின்றது. சுந்தரத் தெலுங்கில் ஜானகி அவர்கள் குரலை ராஜா குழைத்து எடுத்தால் எப்படி இருக்கும்? நீங்களே கேட்டுப் பாருங்கள்.

மொழிமாற்றும் விளையாட்டுக்கள் அக்காலத்திலே தொடங்கிவிட்டது. அப்படியே அந்தப் படத்தை தமிழில் மொழிமாற்றும் போது மொழி மாறிய பாடல்தான் நீர்வீழ்ச்சி தீ மூட்டுதே. சுமார் 4 வருடங்களின் பின்னர் இந்த மெட்டு தமிழில் மீளவும் பிரசவிக்கின்றது.

இந்தியா முழுக்க சுற்றியதானால் ஹிந்தியிலும் வரவேண்டும் தானே? 1996 தென்னிந்தியாவின் ஒரு தலைசிறந்த இயக்குனரான பாலு மகேந்திராவின் ஹிந்தித் திரைப்படமான அவுர் ஏக் ப்ரேம் கஹானி எனும் திரைப்படத்தில் இந்தப் பாடல் இடம்பெறுகின்றது. ஹீரா, ரேவதி, ரமேஷ் அரவிந்த் போன்ற பல தென்னிந்திய திரைப்பட நட்சத்திரங்கள் இந்த திரைப்படம் மூலம் ஹிந்தித்திரையுலகிற்கு அறிமுகம் ஆகினர்.

இதைத் தொடர்ந்து அண்மையில் வெளியான பா திரைப்படத்தில் இந்தப் பாடல் மறுபடியும். அமிதாப்பும் அவர் தனையன் அபிஷேக்கும் நடித்த பா திரைப்படத்தில் ஹிந்தியில் இந்தப் பாடல் கும் சும் கும். தற்காலத்திற்கு ஏற்ற மெருகூட்டப்பட்ட அமைப்புடன் லயிக்க வைக்கின்றது ஹிந்தியில்.

ஏனோ வயது ஏற ஏற மற்ற இசையமைப்பாளர்களின் பாடல்களை விட ராஜாவின் பாடல்கள் இலயிக்க வைக்கின்றது. மெல்ல நகர்ந்து செல்லும் இளமையை இரைமீட்க வைப்பது ராஜா பாடல்கள் மட்டுமே.

2 thoughts on “இந்தியா சுற்றிய தமிழ்ப் பாடல்”

  1. நல்ல இசை. நான் கூட இது வரை கேட்காத பாடல்தான்
    பகிர்வுக்கு மிக்க நன்றி.

Leave a Reply

This site uses Akismet to reduce spam. Learn how your comment data is processed.