Category Archives: திரைப்படங்கள்

Pirates of the Caribbean: Dead Men Tell No Tales திரை விமர்சனம்

Pirates of the Caribbean தொடரில் இதுவரை 4 திரைப்படங்கள் வெளிவந்துள்ளன. இந்த திரைப்படங்களில் முக்கியமான பாத்திரங்களாக இருந்தவை கப்டன் ஜக் ஸ்பரோவ் எனும் கடற் கொள்ளைக் காரன் மற்றும் வில் டேர்ணர் எனும் காப்டன் மற்றும் அவர் காதலி / மனைவி எலிசபெத் ஸ்வான். வில் டேர்ணராக ஒலண்டா புளூம் நடித்திருந்தார் (லேர்ட் ஒப் த ரிங்ஸ் திரைப்படத்தில் லெகலாஸ் பாத்திரம் ஏற்பவர் அவர்தான்.)

முதல் நான்கு பாகங்களின் மையக் கருவே வில் டேர்ணர் மற்றும் எலிசபெத் ஸ்வான் இடையிலான காதலே.

ஐந்தாம் திரைப்படம் Dead Men Tell No Tales

ஏலவே நான்கு திரைப்படங்களை எடுத்து வில் மற்றும் எலிசபெத் இடையிலான கதையை நன்கு கலந்து கரைத்து பரிமாறிவிட்டதால் இப்பொது கப்டன் ஜக் ஸ்பரோவின் வீர தீரச் செயல்களை மையமாகக் கொண்டு புதிய ஒரு தொடரை டிஸ்னிக் காரர்கள் ஆரம்பிக்கின்றார்கள் என்றே நினைக்கின்றேன்.

கதைச் சுருக்கம் (No Spoilers)

ஜக் ஸ்பரோவின் சிறுவயதில் ஒரு ஸ்பானிய கடற்படைக் கப்டனைத் தாக்கி ஒரு மந்திரங்கள் நிறைந்த இடத்தில் சிறை வைத்துவிடுகின்றான். சிறைப்பட்ட ஸ்பானிய கப்டன் சலசார் ஜக் ஸ்பரோவை பழிவாங்கத் துடிப்பதே கதை. மக்களுக்கு வில் டேர்ணர் மற்றும் எலிசபெத் இல்லாத கதை பிடிக்குமோ பிடிக்காதோ என்ற ஐயத்தினால் வில் டேர்ணரின் மகனையும் இந்தக் கதையில் சேர்த்துவிட்டிருக்கின்றார்கள்.

விமர்சனம்

திரைப்படம் சுமார் பரவாயில்லை இரகம். நீங்கள் ஏலவே இந்தத் தொடரைப் பார்ப்பவராயின் நிச்சயமாக இந்தப் பாகமும் உங்களுக்குப் பிடிக்கும். சிறப்பாக சொல்வதற்கு ஒன்றுமில்லை. ஆனால் கப்டன் ஜக் ஸ்பரோவின் விளையாட்டுகளுக்குக் குறைவில்லை என்று கூறிக் கொள்கின்றேன்.

இசை

இந்தத் தொடரில் உள்ள திரைப்படங்களின் மிகப் பெரிய பலம் ஹான் சிம்மர் எனப்படடும் இசையமைப்பாளரின் இசை. கீழே உள்ள பின்ணனி இசையைக் கேட்டுப்பாருங்கள்.. (இசையை முழுதாக இரசிக்க இரண்டு காதிலும் ஒலி வாங்கியை மாட்டிக் கேளுங்கள்)

இளையராஜா, இரகுமான் போல ஹொலிவூட்டில் சிங்கம் தனக்கென்று ஒரு இரசிகப் பட்டாளத்தையே வைத்துள்ளது. இந்தத் திரைப்படத்தில் அவர் இல்லாமை படத்தின் மிகப் பெரிய பலவீனம் என்றும் கூறலாம். இல்லை அவர் சிஷ்யன் அசத்தியிருக்கின்றார் என்றும் நீங்கள் கூறிக் கொள்ளலாம்.

முடிவுரை

திரைப்பட முடிவில் வில் டேர்ணர் மற்றும் எலிசபெத் வரும் காட்சியைப் பார்க்கும் போதுதான் அடடா.. இந்தத் திரைப்படத்தில் இவ்வளவு காலமும் இரசித்தது அந்தச் சோடியைத்தான் என்று உறைத்தது. அப்படியே 10 வயது குறைந்து போனது போல ஒர் உணர்வு.

என்னைப் பொறுத்தவரையில் ஜக் ஸ்பரோவின் நகைச்சுவைகள் மற்றும் வீர சாகசங்களை இரசிப்பவர்களுக்கு இந்தத் திரைப்படம் பிடிக்கும் மற்றவர்களுக்கு சுமார் இரகம்தான்.

The Dark Tower : தமிழ் திரை விமர்சனம்

The Dark Tower எனும் புத்தகத் தொடரை உலகப் புகழ் பெற்ற எழுத்தாளர் ஸ்டீபன் கிங் எழுதியிருந்தார். The Dark Tower : The Gunslinger எனும் பெயரில் 1982 இல் எழுதிய புத்தகத்தைத் தழுவியே இந்தத் திரைப்படம் எடுக்கப்பட்டுள்ளது. 1982 தொடக்கம் 2012 வரை மொத்தம் ஒன்பது புத்தகங்கள் இந்தத் தொடரில் உள்ளன.

புத்தகம் Vs திரைப்பகம்

ஸ்டீபன் கிங் தான் எழுதிய புத்தகங்களில் இதுதான் மிகவும் தனக்குப் பிடித்தமானதும் பிரமாண்டமானதும் என்று குறிப்பிட்டிருக்கின்றார். ஆனாலும் புத்தகம் இரசிகர்கள் மத்தியில் பெற்ற வெற்றியோடு ஒப்பிடும் போது திரைப்பம் அவ்வளவாக சோபிக்கவில்லை.

ஒரு புத்தகத்தைத் திரைப்படமாக்கும் போது எப்போதுமே அது அந்தப் புத்தக இரசிகர்களைத் திருப்திப்படுத்தியதாக வரலாறில்லை. ஆனால் இந்த முறை புத்தகப் பிரியர்களை மட்டுமல்ல சாமான்ய இரசிகர்களையும் இந்தத் திரைப்படம் அவ்வளவாகக் கவரவில்லை.

கதைச் சுருக்கம் (No Spoilers)

அமெரிக்க நகரில் வாழும் ஒரு சிறுவன் அடிக்கடி விபரீதமாக மனிதர்களையும் இடங்களையும் தனது கனவில் காண்கின்றான். தனது கனவில் கண்டவற்றை சித்திரமாக (Sketches) கீறி வைத்துக் கொள்கின்றான்.

இவன் கனவுகளில் காண்பவற்றை தனது பெற்றோரிடம் கூறியதும் இவன் ஏதோ பைத்தியம் பிடித்து உளறத் தொடங்கிவிட்டான் என்று எண்ணும் நிலமைக்கு சென்றுவிடுகின்றது.

யாரும் தன்னை நம்பாத போது கனவில் கண்ட நபர்களைத் தேடி சிறுவர் தனது பயணத்தை ஆரம்பிக்கின்றான். பயணத்தில் அவன் காணும் வீர தீரச் செயல்களே கதையின் மிகுதி.

ஏன் திரைப்படம் சோபிக்கவில்லை?

இந்தத் திரைப்படத்தில் வரும் காட்சிகளும் கதையும் ஏலவே பல திரைப்படங்களில் போட்டு நன்று அலசிக் கழுவிக் காயப் போட்டுவிட்டார்கள். அதனால் இந்தத் திரைப்படத்தைப் பார்க்கும் போது புதியதாய் ஒரு fantasy திரைப்படத்தைப் பார்க்கும் உணர்வு ஏற்படவில்லை.

மேலும் திரைப்படத்திற்காக புத்தகத்தின் கதையில் பெருமளவை வெட்டிவிட்டதனால் கதையும் சோபிக்கவில்லை.

பலரும் திரைப்படத்தைப் பற்றி பல்வேறு விதமாகப் பேசியபோதும் குறிப்பாக திரைக்கதை எழுதிய அகிவா கோல்ட்ஸ்மன் பற்றி பலவாறு பேசியபோதும் அவை அனைத்தையும் ஸ்டீபன் கிங் மறுத்துள்ளார். அடுத்த பாகம் எடுக்கப்பட்டால் அதை R rated திரைப்படமாக எடுக்க வேண்டும் என்றும் வேண்டியுள்ளார்.

அடுத்த பாகம்?

திரைப்படம் எதிர்பார்த்த அளவு செல்லாத காரணத்தினால் அடுத்தபாகம் எடுக்கும் வேலைகள் ஸ்தம்பிதமாகியுள்ளதாகத் தெரிகின்றது. ஆயினும் Dark Tower கருவை மையமாகக் கொண்டு தொலைக்காட்சித் தொடர் ஒன்று தயாராவதாகத் தெரிகின்றது. அதாவது தடைப்படாமல் வெளிவரும் என்று நம்புவோம்.

மேலும் இந்தக் கதையைக் களமாகக் கொண்டு ஒரு காமிக்சும் வெளிவந்துள்ளது. அதனை கொழும்பில் இம்முறை நடைபெற்ற பிக் பாட் வூல்ப் புத்தகக் கண்காட்சியில் வாங்கினேன். வாசித்து முடிந்ததும் அதற்கான விமர்சனத்தையும் எழுதிவிடுகின்றேன். ஆனால் சற்றுக் காலம் பொறுத்திருக்க வேண்டும்.

வழமை போல நீங்கள் fantasy மற்றும் wild west இரகத் திரைப்படங்களைப் பார்ப்பவராயின் இந்தத் திரைப்படம் உங்களை கவரலாம். ஆயினும் திரைக்கதை மிகவும் பலவீனமாக உள்ளதையும் கணக்கில் கொள்ளுங்கள்.

War for the Planet of the Apes – தமிழ் விமர்சனம்

தலைப்பிற்கேற்றவாறு ஒரு யுத்தம் சம்பந்தமான திரைப்படம் ஆரம்பிக்கும் போது எப்படி ஆரம்பிக்குமோ அது போலவே இந்தத் திரைப்படமும் ஆரம்பிக்கின்றது. பச்சைப் பசேலென அமைந்த அடர் காடுகளின் நடுவே படை வீரர்கள் பச்சைச் சீருடையுடன் துப்பாக்கிகளை உயர்த்தியவாறே மெல்ல மெல்ல நகர்கின்றனர்.

முன்னால் சிறிது தூரத்தில் ஒரு குரங்குளின் பாசறை தெரிகின்றது. மனிதர்களின் இராணுவம் மெல்ல மெல்ல நகர்ந்து பாசறையை சுற்றி வளைத்த பின்னர் தனது காட்டுத் தனமான தாக்குதலைத் தொடங்குகின்றது. எதிர்பாரா விதமாகத் திரும்பும் சண்டையில் குரங்குகள் வெற்றியடைகின்றன. பிடிக்கப்பட்ட மனித இராணுவ வீரர்களைக் காண குரங்குகளின் தலைவன் சீசர் வருகின்றார்.

Planet of the Apes

இந்தப் பிளனட் ஓப் தி ஏப்ஸ் தொடர் திரைப்படம், நாவல், கொமிக்ஸ் மற்றுத் தொலைக்காட்டிச் தொடர் என்று பல வட்டங்களை சுற்றி வந்துள்ளது. இவை அனைத்திற்கும் மூலம் 1963இல் வெளி வந்த பிரஞ்சு நாவலான La Planète des Singes இல் இருந்தே ஆரம்பித்துள்ளது. இந்த நாவல் பிற்காலத்தில் ஆங்கிலத்தில் Planet of the Apes என்று அமெரிக்காவிலும் Monkey Planet என்ற பெயரில் ஐக்கிய இராச்சியத்திலும் வெளியிடப்பட்டுள்ளது.

இதன் பின்னர் 1968 முதல் 1973 வரை Planet of the Apes எனும் கருவை மையமாக வைத்து ஐந்து திரைப்படங்கள் வெளி வந்தன.

பின்னர் Planet of the Apes (1974) மற்றும் Return to the Planet of the Apes (1975–1976) என்று இரண்டு தொலைக்காட்சித் தொடர்களும் எடுக்கப்பட்டன.

பணம் பார்க்கலாம் என்று தெரிந்தால் திரைப்படத் தயாரிப்பாளர்கள் சும்மா இருப்பார்களா? 😉 அத்துடன் விட்டு விடாமல் 2001 இல் Planet of the Apes எனும் பெயரில் மீளவும் ஒரு திரைப்படத்தை எடுத்தனர். இதைத் தொடர்ந்து சில கணனி விளையாட்டுக்களும் அக்காலத்தில் இந்தக் கருவை மையமாக வைத்து வெளியிடப்பட்டது.

Reboot series

பொதுவாக ரீமேக் மற்றும் ரீபூட் செய்யப்படும் திரைப்படங்கள் அவ்வளவாக சோபிப்பதில்லை. ஆனால் இந்த தொடரில் செய்யப்பட்ட திரைப்படங்கள் மூன்றுமே மிகவும் அருமையாக வந்துள்ளது. இந்தத் தொடரில் இறுதியானதும் மூன்றாவதுமான திரைப்படம் பற்றிய விமர்சனமே இது.

விமர்சனம்

மனிதர்களைப் போல (அல்லது அவர்களை விட சிறிதே அதிகமாக) குரங்குள் புத்திசாதூர்யம் படைத்தவர்களாக மாறிய உலகில் மனிதர்கள் மற்றும் குரங்குகள் இடையே நடக்கும் யுத்தம் / போட்டி பற்றியதே இந்த தொடர்களின் சாரம்.

இந்தப் பாகத்தில் குரங்குகளின் தலைவர் சீசரின் குடும்பத்தை மனிதர்கள் சிதைத்துவிடவே அதற்குக் காரணமான இராணுவத் தலைவர் கேணலைத் தேடி குரங்குகளின் தலைவர் சீசர் தன் பயணத்தை ஆரம்பிக்கின்றார். உயிரிற்கு மேலான தலைவரைத் தனியே அனுப்புவதை விரும்பாத சீசரின் போராட்டக் குணம் கொண்ட சில நண்பர்களும் சீசருடன் தமது பயணத்தை ஆரம்பிக்கின்றனர்.

இந்தக் காட்சிகள் அனைத்துமே நாம் பார்த்த வேறு வேறு திரைப்படங்களை ஞாபகப்படுத்துவதாக இருந்தாலும் இந்தத் திரைப்படக் காட்சிகள் நம்மை அப்படியே பிணைத்துப் போட்டுவிடுகின்றன.

CGI (கணனி கிராபிக்ஸ்) திரைப்படம் முழுதும் பாவிக்கப்பட்டிருந்தாலும், காடுகளும், பனி மலைகளும் மொத்தத்தில் இயற்கை திரைப்படம் முழுவதும் நிறைந்திருந்து பார்ப்போரை நிஜமாக களத்திற்கே அழைத்துச் சென்றுவிடுகின்றது.

Bad Ape

படத்தில் சீசர் மற்றும் அவரது குழுவுடன் இடையில் இணைந்து கொள்ளும் ஒரு குரங்குதான் பாட் ஏப் எனப்படும் ஒரு குரங்கு. மிருகக் காட்சிசாலையில் இருந்து தப்பித்த இந்தக் குரங்கு திரைப்படத்தில் மெலிதான நகைச்சுவையைக் கொண்டுவர பாவிக்கப்பட்டுள்ளது.

சீசர் போல இந்தக் குரங்கும் ஆங்கிலத்தைப் பேசுகின்றது. பிரியாணிக்கு அளவாக உப்புப் போடுவது போல திரைப்படத்தின் போக்கை சிதைக்காமல் பாட் ஏப் எனும் இந்தப் பாத்திரம் மூலம் மெலிதான நகைச்சுவைக் காட்சிகளை வடிவமைத்துள்ளனர். படம் முடியும் போது பாட் ஏப் எமது மனதில் ஒரு இடம் பிடித்திருக்கும்.

மெதுவாக நகரும் திரைக்கதை

திரைப்படம் மிகவும் மெதுவாகவே நகர்கின்றது என்ற ஒரு குற்றச்சாட்டு இந்தத் திரைப்படத்தைப் பார்த்த சிலரிடம் உள்ளது. ஆனாலும் இந்தத் திரைப்படத்தில் வெறும் சண்டைக் காட்சிகளை மட்டும் காட்டியிருந்தால் இவ்வளவு தாக்கத்தை மக்கள் மத்தியில் ஏற்படுத்தியிருக்காது என்பது என் எண்ணம்.

மனிதர்களின் ஆள் மனதில் இருக்கும் வன்மம், சுயநலவாதம், எல்லையற்ற பழிவாங்கும் எண்ணம் என்பவற்றை இத்திரைப்படத்தில் அருமையாகக் காட்டியுள்ளார்கள். மனிதர்கள் போல சிந்திக்க ஆரம்பிக்கும் குரங்குகளுக்கும் இந்த இயல்புகள் மெல்லத் தொற்றுவதைத் திரைப்படத்தில் அழகாகக் காட்டியுள்ளார்கள்.

மேலும் யுத்தம் ஒன்று நடக்கும் போது மனிதர்கள் எவ்வாறான கொடூரர்களாக மாறுவார்கள் என்பதையும் காட்டுகின்றது. பெரும் யுத்தத்தைக் கடந்து வந்த எமது சந்ததியினர் இதனைப் பல இடங்களில் எம்முடன் பொருத்திப் பார்ப்பதைத் தவிர்க்க முடியாது.

எந்த யுத்தத்திலும் கோடாரிக் காம்புகளிற்குக் குறைவிருக்காது. தன் சொந்த இனத்தையே காட்டிக் கொடுக்கும் சந்தர்ப்பவாதிகளை வரலாற்றின் ஊடு கண்டிருக்கின்றோம். புத்தி சாதூர்யம் கூடியதும் மனிதர்கள் போல குரங்குகளும் இவ்வாறு இருப்பதைக் காணும் போது அடச் சே! என்று எண்ணத் தோன்றியது.

இவையனைத்தையும் எட்டவே அல்லது திரையில் விபரிக்க முனைந்ததாலேயே இந்தத் திரைக்கதை சற்று மெதுவாக நகர்வதாக நான் எண்ணுகின்றேன்.

முடிவு

அக்சன் மற்றும் கதை உள்ள திரைப்படங்களை பார்க்க விரும்புபவராயின் கட்டாயம் இந்தத் திரைப்படத்தை நீங்களும் பாருங்கள். உங்களை இந்தத் திரைப்படம் ஏமாற்றாது.

300: Rise of an Empire விமர்சனம்

கல்லூரிக் காலத்தில் இரத்தம் தெறிக்கும் திரைப்படம் என்று பேசினால் முதலில் ஞாபகத்திற்கு வருவது 2007இல் வெளி வந்த 300 திரைப்படம். அக்காலத்திலேயே அந்த திரைப்படம் பற்றி விமர்சனம் எழுத அந்த திரைப்படம் தூண்டியது என்றால் பாருங்களேன்.

300 இன் முதலாம் பாகம்

300

அதாவது படையெடுத்து வரும் மாபெரும் பாரசீகப் படையை எதிர்த்துக் களமிறங்கும் கிரேக்கத்து படைவீரர்கள் 300 பேரின் கதை. லியனொய்டஸ் எனும் ஸ்பார்ட்டா நரத்தின் அரசன் (கிரேக்கம் பல நகரங்களின் கூட்டமைப்பு) தனது சிறந்த 300 வீரர்களுடன் இணைந்து ஒரு ஒடுங்கிய கணவாய் வாயிலில் பாரசீகப் படைகளை எதிர்க்கின்றான். பெரும் படை வைத்திருந்தாலும் ஒடுங்கிய கணவாயில் அவர்களை பின் தள்ள முடியாமல் பாரசீகப் படைகள் திணறுகின்றன. வீரம், விவேகம் துரோகம் என கோச்சடையான் ஸ்டைலில் கதை வேகமாக நகரும் (ஆனால் கணனி வரைகலை மோசன் கப்சன் என்ற பெயரில் மோசன் போற மாதிரி இருக்காது). அருமையான திரைப்படம். அதுவும் குறிப்பாக அந்த சண்டைக் காட்சிகள் அக்காலத்தில் ஒரு மாபெரும் புரட்சி. இரத்தம் தெறிக்கும் காட்சிகள் அப்படி அபாரமாக படமாக்கப்பட்டிருக்கும். அக்காலத்தில் அந்த திரைப்படத்திற்கு எதிராக பெரும் காரசாரமான கருத்துக்களும் முன்வைக்கப்பட்டது. குறிப்பாக பாரசீக அரசரையும் அவர் படையையும் ஏதோ காட்டுமிராண்டிகள் கணக்கில் காட்டியதாக.

முதலில் முதல் பாகத்தின் ட்ரெயிலரைக் காணுங்கள்

300 இன் இரண்டாம் பாகம்

300 rise of an empire tamil poaster

இப்போது Rise of an Empire விமர்சனம்.  அனேகம் முதலாம் பாகம் வெற்றியடைந்தால் அந்தப் பெயரை வைத்து இரண்டாம் பாகத்தை எடுத்து (மொக்கையாக இருந்தாலுமே) பணம் பார்ப்பது ஹாலிவூட் காரர்களின் கைவந்த கலை. அதில் விதிவிலக்காக Toy Story, Shrek போன்றவை இருந்தாலும் பெரும்பாலும் முதல் பாகத்தில் பெயரில் பணம் சம்பாதிக்கவே பயன்படுகின்றது.

என்னைப் பொறுத்தவரையில் இந்த திரைப்படமும் அவ்வகையிலேயே அமைகின்றது. பெரும் பணச்செலவில் கணனி வரைகலையைப் பயன்படுத்தி 300 போலவே கடலில் நடக்கும் சண்டைக் காட்சிகளை பிரமாண்டமாகப் படமாக்கியுள்ளார்கள். ஆனால் திரைக்கதை?? திரைக்கதை மரண மொக்கையாக உள்ளது. முதற் பாகத்தில் திரைக்கதையில் இருந்த வேகம், பரபரப்பு, பதைபதைப்பில் அரைவாசி கூட இந்த திரைப்படத்தில் இல்லை. சிலவேளை முதல் பாகத்திற்கு கிடைத்த எதிர்ப்பின் விளைவாக இப்படியாக செய்தார்களோ தெரியாது.

இந்த திரைப்படத்தில் கதைக்களம் கிட்டத்தட்ட லியனொய்டஸ் பாரசீக அரசனை யுத்தத்தில் எதிர்கொள்ளும் அதே காலகட்டத்தில் கடல்வழியாக வந்திறங்கும் கிரேக்கப்படையை கடலில் எதிர்த்துப் போராடும் கிரேக்க படைத்தளபதி தேமிஸ்டொகில்ஸ் என்பவரின் கதை. கிரேக்கம் மீது படையெடுக்கும் டாரியஸ் எனும் மன்னனை கொல்வதன் மூலம் அவர் மகனை பரமவைரியாக மாற்றிவிடுகின்றார் தெமிஸ்டோகில்ஸ். அதனைத் தொடர்ந்து டாரியசின் மகன் தெய்வ அரசன் எனும் நிலையை அடைவது எவ்வாறு பின்னர் அவன் பழிவாங்கும் படலம் எனக் கதை தொடர்கின்றது.

முதல் பாகத்தில் பாத்திர அமைப்பு சிறப்பானது. ஒவ்வொரு சிறிய பாத்திரங்களையும் பார்த்து பார்த்தி செதுக்கியிருப்பார்கள். இந்த திரைப்படத்தில் சில முக்கிய பாத்திரங்களில் மட்டுமே கவனம் செலுத்தியுள்ளார்கள். ஏதோ கணனி வரைகலையில் கலக்கிவிட்டால் எல்லாம் சரிஎன்று யோசித்திருப்பார்கள் போல.

ஆயினும் முன்பே கூறியபடி நன்றாக கல்லாகட்டிவிட்டார்கள். குறிப்பாக 100 மில்லியன் டாலர் அளவில் பணம் போட்டு படத்தை எடுத்து சுமார் 200 மில்லியன் அளவில் பணம்பார்த்துவிட்டார்கள். அனேகம் பாகம் 3 ஐ விரைவில் எடுத்தாலும் ஆச்சரியப்படுவிதற்கில்லை.


புள்ளி 60/100

 

இந்தியா சுற்றிய தமிழ்ப் பாடல்

இசைஞாணி இளையராஜா 80களில் கொடுத்த ஒரு மெகா ஹிட் பாடல்தான் சங்கத்தில் பாடாத கவிதை. 84இல் வெளியான இந்தப்பாடல் கிட்டத்தட்ட என்னுடைய வயதை உடையது. காலத்தைத் தாண்டி இன்றும் கேட்போர் மனதைக்கொள்ளை கொள்ளும் இந்தப் பாடல் இந்தியா முழுவதும் பல மொழிகளில் பாடப்பட்டதை அறிவீர்களா.

முதலில் தமிழ்ப் பாடல் சங்கத்தில் பாடாத கவிதை
படம்: ஆட்டோ ராஜா

பாலு மகேந்திரா இசையால் மயங்கி இதை தனது மலையாளப்படத்தில் பாவிக்கின்றார். தும்பி வா என்று இன்றுவரை பலர் இந்தப்பாடலை சிலாகித்துக் கேட்பதைக் கேட்கலாம். அண்மையில் நீ தான் என் பொன்வசந்தம் திரைப்படப் பாடல்கள் வெளியீட்டு விழாவிலும் பாலுமகேந்திராவிடம் ராஜாவின் பிடித்த பாடல் ஒன்றைச் சொல்லுமாறு கேட்டதும் இந்தப்பாடலைத்தான் சொன்னார். அழகான மொழி மலையாளத்தில் அருமையாக ஒலிக்கின்றது ஜானகி அவர்களின் குரல். தமிழிற்கு முன்னர் மலையாளத்தில் இந்தப்பாடல் வெளியானது.

தெலுங்கில் ஆகாசம் ஏனாடிடோ என்று ஒலிக்கின்றது. சுந்தரத் தெலுங்கில் ஜானகி அவர்கள் குரலை ராஜா குழைத்து எடுத்தால் எப்படி இருக்கும்? நீங்களே கேட்டுப் பாருங்கள்.

மொழிமாற்றும் விளையாட்டுக்கள் அக்காலத்திலே தொடங்கிவிட்டது. அப்படியே அந்தப் படத்தை தமிழில் மொழிமாற்றும் போது மொழி மாறிய பாடல்தான் நீர்வீழ்ச்சி தீ மூட்டுதே. சுமார் 4 வருடங்களின் பின்னர் இந்த மெட்டு தமிழில் மீளவும் பிரசவிக்கின்றது.

இந்தியா முழுக்க சுற்றியதானால் ஹிந்தியிலும் வரவேண்டும் தானே? 1996 தென்னிந்தியாவின் ஒரு தலைசிறந்த இயக்குனரான பாலு மகேந்திராவின் ஹிந்தித் திரைப்படமான அவுர் ஏக் ப்ரேம் கஹானி எனும் திரைப்படத்தில் இந்தப் பாடல் இடம்பெறுகின்றது. ஹீரா, ரேவதி, ரமேஷ் அரவிந்த் போன்ற பல தென்னிந்திய திரைப்பட நட்சத்திரங்கள் இந்த திரைப்படம் மூலம் ஹிந்தித்திரையுலகிற்கு அறிமுகம் ஆகினர்.

இதைத் தொடர்ந்து அண்மையில் வெளியான பா திரைப்படத்தில் இந்தப் பாடல் மறுபடியும். அமிதாப்பும் அவர் தனையன் அபிஷேக்கும் நடித்த பா திரைப்படத்தில் ஹிந்தியில் இந்தப் பாடல் கும் சும் கும். தற்காலத்திற்கு ஏற்ற மெருகூட்டப்பட்ட அமைப்புடன் லயிக்க வைக்கின்றது ஹிந்தியில்.

ஏனோ வயது ஏற ஏற மற்ற இசையமைப்பாளர்களின் பாடல்களை விட ராஜாவின் பாடல்கள் இலயிக்க வைக்கின்றது. மெல்ல நகர்ந்து செல்லும் இளமையை இரைமீட்க வைப்பது ராஜா பாடல்கள் மட்டுமே.

இலங்கையில் 3டி சினிமா

சிறுவயதில் பாடசாலையில் படிக்கும் காலத்தில் மைடியர் குட்டிச் சாத்தான் என்று ஒரு முப்பரிமானத் திரைப்படம் வெளியானது. இதுவே எனது வாழ்க்கையில் அல்லது பலரது வாழ்க்கையில் கண்ட முதலாவது முப்பரிமானத் திரைப்படம். ஆயினும் உலகம் முழுவதும் 3டி திரைப்படங்கள் சக்கை போடும் நேரத்தில் இலங்கையில் மட்டும் எப்போதும் 3டி திரைப்படங்கள் வெளியாவதே இல்லை.

இந்த நீண்டநாள் குறையை இலங்கையின் தலைநகரில் அமைந்துள்ள மஜஸ்டிக் சினிமா நீக்கியுள்ளது. இனிமேல் 3டி திரைப்படங்களைக் காட்டுவதற்காகவே என்று ஒரு திரையரங்கை மஜஸ்டிக் ஐந்தாம் மாடியில் அமைத்துள்ளனர். சுமார் 150 பேர் இருக்கக்கூடிய வசதி உள்ள இந்த திரையரங்கில் முப்பரிமானத் திரைப்படங்களைக் காட்டுவதாகவே உத்தேசம் செய்துள்ளனராம்.

தற்போது த்ரீ மஸ்கட்டீயர்ஸ் என்ற திரைப்படத்தைக் காட்டுகின்றார்கள். ஆரம்பக் காட்சிகளில் முப்பரிமானக் காட்சிகள் நிறைந்து இருந்தாலும் திரைப்படம் முழுவதும் 3டி காட்சிகள் இல்லை. அல்லது 3டி எபெக்டு குறைவாக இருந்தது. விரைவில் சிறப்பான 3டி திரைப்படங்களையும் இங்கே காட்டுவார்கள் என்று நம்புவோமாக.

மஜஸ்டிக் சிட்டியில் இப்போது மொத்தம் நான்கு திரையரங்குகள் நிறுவப்பட்டுள்ளன.

தற்போது காட்டப்படும் காட்சிகள்

 

  1. சுப்பீரியர் 3டி – இதுவே நான் குறிப்பிட்ட முப்பரிமான திரையரங்கம். சுமார் 150 பேர் இருக்கக்கூடியதாக இருப்பதுடன் நுழைவுக் கட்டனம் 600 ரூபா
  2. கோல்ட் – இது ஒரு மினிசினிமா. நுழைவுக் கட்டனம் 750 ரூபா. இலவச சிற்றுண்டி, குடிபாணம் வழங்கப்படும்.
  3. அல்ட்ரா – சாதாரண சினிமா நுழைவுக் கட்டனம் 400 ரூபா
  4. பிளாட்டினம் – பழைய மஜஸ்டிக் சினிமா
கொழும்பிற்கு ஒருவகையாக 3டியும் வந்தாச்சு விரைவில் iMax ஐயுக் கொண்டுவந்தால் சிறப்பாக இருக்கும். ஹைதராபாத்தில் 3டி ஐமாக்ஸில் திரைப்படம் பார்த்த அனுவத்தின் பின்னர் அப்படியான ஒரு திரைப்பட அனுபவம் இதுவரை அடியேனுக்கு கிடைக்கவேயில்லை.
விரைவில் நல்ல ஒரு ஐமாக்ஸ் தியட்டரும் இலங்கைக்கு கிடைக்கும் என்று நம்புவோமாக.

நான் மகான் அல்ல – விமர்சனம்

கார்த்தி & கஜல் அகர்வால்

காதல் கதையா க்ரைம் கதையா என்று யோசித்து முடிப்பதற்குள் படம் முடிந்து விடுகின்றது. முதல் பாகம் காதல் கதையாகவும் கார்த்தியின் கிளு கிளு காதல் நகர்வுகளுடன் நகர்கின்றது. அதே முரட்டுப் பொடியனாகத்தான் இன்னமும் கார்த்தி வலம் வருகின்றார்.

இரண்டாம் பாதி வன்முறையில் நனைகின்றது. முதல் பாதியிலேயே வன்முறை தொடங்கிவிட்டாலும் இரண்டாம் பாகத்தில் முற்றிவிடுகின்றது.

கதை என்னவென்றால் கல்லூரி மாணவர்கள் மது, போதை வஸ்துக்கள் மற்றும் பெண்களைக் கற்பழிப்பு என்று அலைகின்றது. இவ்வாறு பாதிகப்பட்ட ஒரு பெண்ணைக் கடத்த அதை கார்த்தியின் தகப்பனார் பார்த்துவிடுகின்றார்.

பொடியள் பட்டாளம் கொலைக்குச் சாட்சியான கார்த்தியின் தந்தையை போட்டுத்தள்ள முயல்கின்றார்கள். போட்டுத் தள்ளினார்களா?? கார்த்தி அந்த பாவிகளை என்ன செய்தார்?? பொலிஸ் என்ன செய்தது?? என்பவற்றிற்கு விடை திருட்டு விசிடியிலோ அல்லது அருகில் உள்ள திரையரங்கிலோ கிடைக்கலாம்.

இயக்குனர் சுசீந்திரன் புதிய கள்ளை பழைய மொந்தையில் தந்துள்ளார். ஆனாலும் படம் மோசமில்லை. படம் ஆரம்பித்து முடிக்கும் வரை விறு விறு என்று கதை நகர்கின்றது. கிளைமாக்ஸ் சண்டைக் காட்சிகள் ஒரு கட்டத்திற்கு மேல் வெறுப்பேற்றுகின்றது. முடிவு அடியேனுக்குப் பிடித்திருந்ததே.

கஜல் அகர்வால் படத்தில் என்ன செய்கின்றார் என்று யாராவது சொன்னால் ஒரு இலட்சம் பரிசு வழங்கப்படும். சும்மா ஏதோ ஒரு கதாநாயகி தேவை என்பதற்காக வந்து போகின்றார். சில சிலுமிசங்கள் மட்டுமே கார்த்தியுடன் செய்து விட்டு மறைந்து போய்விடுகின்றார்.

யுவனின் இசை இலயிக்கின்றது. கார்த்தி கோபம் கொள்ளும் கிளைமாக்ஸ் காட்சிகளில் ராக் இசை அபாரம். அதைவிட “இறகைப் போல” பாடல் மனதில் நச் என்று பதிந்து விடுகின்றது.

கண்ணோரம் காதல் வந்தால் கண்ணீரும் தித்திப்பாகும்
வேறொன்றும் தேவையில்லை நீ மட்டும் போதும் போதும்
என்னோடு நீயும் வந்தால் எல்லாமே கையில் சேரும்
வேறொன்றும் தேவையில்லை நீ மட்டும் போதும் போதும்

காட்சியமைப்புகள், சண்டைக் காட்சிகளும் அருமை. மொத்தத்தில் கார்த்தி அண்ணனை விஞ்சப்போகும் பந்தையக் குதிரை. சூரியா உங்கள் கதிரையை இறுக்கிப் பிடித்துக் கொள்ளுங்கள்.

சுறா ரியாக்சன் – இணையத்தில் விமர்சனங்கள்

ட்விட்டர்

சுறா விசய்

@webalfee naan avan illai – சமாதானமா போக புறா இல்ல சுறா vs சமாதானமா போக சாமி இல்ல ஸ் வாமி.. http://bit.ly/aOznOS

@TBCD வசனம் பேசுவதில் ஒரு ங்கொன்னியா மாதிரி வேற குரலில் பேசுவாரே, அதை படம் முழுக்க செஞ்சி நம்மை சோதிக்கிறார் “சுறா”

@dynobuoy @penathal சுறா மேரி… எங்க பேச்சை நாங்களே நோ லிசனிங்! அதுக்குதான் ஆயிரக்கணக்கான மாக்காள் இருக்காங்களே?

scanman #சுறா படு கேவலம். தயவு செய்து காசையும் நேரத்தையும் வீனாக்காதேன்னு நண்பன் ஒருவன் கோவையிலிருந்து கூப்பிட்டு சொன்னான்.

@TBCD @nandhakumar மிகவும் மோசமென்று சொல்ல முடியாது. சுறா தப்பிக்கும் !

@nattanu சுறா செம கடி கடிக்குதாமே? 20 $ ஆப்பா இன்னிக்கு நைட் 🙁

nandhakumar சுறா போய் விட்டு வந்து 20 நிமிடத்தில் வெளி வந்து விட்டேன். இவ்வளவு மொக்கையாக விஜய் படம் இது வரை வந்ததில்லை என்றே சொல்லலாம்

@dakannan கதைதான் ரீமேக் என்றால் பாடல்களுமா என்ற அலுப்புதான் மிஞ்சுகிறது – “சுறா” : திரை விமர்சனம்

@subankan சுறா விமர்சனங்களோட தொல்லை தாங்காம தமிழ்மணமே ஸ்டக்கிடுச்சுடா #தளபதி வாழ்க

@nirujah டிஷானும் அவுட்…! சுறா பாக்கிறதை விட சிறிகட் பாக்கலாம் போல இருக்கு 😉

மேலும் ட்வடிட்டர் நச் காண…

பீட்டர் தளங்கள்

http://www.tamilstudios.com
He sings and dances with elan, wears stylish costumes to make a point to his colleagues and audiences alike and, as expected of any Tamil super-hero, fights every evil-doer in the vicinity with single-handed panache.

தமிழ் விமர்சனங்கள்

அகசியம்

தமானா சகிதம் விஜய்

கிராமத்து ஒவ்வொரு வீடுகளின் பிள்ளையாகவும் திகழும் விஜய், அவர்களின் கஸ்டங்களைப் போக்கிய பின்பே திருமணம் செய்வது என்ற ஐடியாவில் இருக்கின்றார். (அது ஒரு வசனத்தோட சரி). இந்தவேளை ஹீரோயின் அறிமுகம். தன் நாய்க்குட்டி இறந்ததற்காக கடலிலுள் தற்கொலை செய்யவரும் தமன்னாவை விஜய் காப்பாற்றுகின்றார். அதன் பின் விஜயின் நல்ல குணங்களை பார்த்து காதலிக்கின்றார். ஆடல், பாடல் கொண்டாட்டம் ஒருபுறம்.

சாத்தூர் மாக்கான்
எப்படியாப்பட்ட பெரிய நடிகரும், ‘இது மக்களுக்குப் பிடிக்குமா… நிராகரித்து விடுவார்களோ’ என்ற பயத்துடன், பார்த்துப் பார்த்து படங்கள் செய்யும் காலம் இது. ஆனால் விஜய் போன்றவர்களுக்கு அந்தக் கவலை கிஞ்சித்தும் இல்லை.

கோழிப் பையன்
மீனவ குப்பத்தை காலிசெய்து அதில் தீம் பார்க் ஒன்றை கட்ட நினைக்கும் ‘ரவுடி’ மந்திரி குப்பத்தை தீவைத்து கொளுத்த அதில் ஹீரோவை சிக்கவைத்து இறந்துவிட்டதாக நம்பவைத்து குப்பத்து மக்களை வேறிடம் சென்று தங்க ஏற்பாடு செய்யும் வேளையில் தீயிலிருந்து ஹீரோ வெளிவருகிறார்.

“எம்மேல கை வைக்கிறதுக்கு முன்னால ஒரு தடவைக்கு ரெண்டுதடவை யோசிச்சு வை. வச்சிட்டா அப்புறம் யோசிக்க நீ இருக்க மாட்டே.”

தமயந்தி
இம‌ய‌ம‌லைல‌ ரூம் போட்டா ம‌ட்டுமே இதெல்லாம் யோசிக்க‌வே வ‌ரும்.அப்புற‌ம் த‌ம‌ன்னா..என்ன‌ ஒரு நிற‌ம். ப‌ட் அவ‌ங்க‌ வாய் ம‌ட்டும் ஏன் இந்த‌ காதுக்கும் அந்த‌ காதுக்கும் வ‌ரை பால‌ம் போடுதுனு ச‌த்திய‌மா புரிய‌ல‌.க‌ட‌வுள்ட்ட‌ ச‌த்திய‌மா கேக்க‌ வேண்டிய‌ கேள்வி.ம‌ணிச‌ர்மா இசைல‌ “த‌ஞ்சாவூர் ஜில்லாகாரி ” பாட்டு அதிர‌ வைக்குது.

சாளரம்
சட்டை பட்டனை போடாமல் திறந்த மார்போடு அதே திருமலை விஜய். ஆனால் இதுவரை போடாத கலர்களில் இருக்கின்றன அவர் அணியும் சட்டைகள். படத்தின் இரண்டாம் வித்தியாசம் அவரின் வீடு. கடற்கரையோரம் இருக்கிறது. இதுவரை எந்த விஜய் படத்திலும் இப்படி இருந்ததில்லை. அந்த குப்பத்தில் ஒரு போட்டி. யார் கடலின் நடுவே சென்று நிறைய மீன் பிடித்து வருகிறார்கள் என்ற போட்டி. வழக்கமாய் ரன்னிங் ரேஸ், கார் ரேஸ் என்றுதான் இருக்கும். ஆனால் இதில் வித்தியாசமாய் கடலில் ஒரு போட்டி. வழக்கம் போல் விஜய்தான் ஜெயிக்கிறார். ஜெயித்தவுடன் பாடல்.

Shockan
விஜய் நன்றாக நடனம் ஆடுகிறார்… வழக்கம் போல சண்டை போடுகிறார்… ஏகப்பட்ட பஞ்ச் வசனங்களைப் பேசுகிறார். மீனவர் உரிமை, இலங்கைத் தமிழர் பிரச்சனையெல்லாம் தொடுகிறார்… !

கூகிள் பஸ்

பவானந்தன்
சுறா படம் வெளிவருவதற்கு முன்னர் வரை ஒரே நேரத்தில் பத்துப் பதினைந்து படங்களில் நடித்துவந்த வடிவேலு சுறா படத்தின் முதலாவது காட்சிக்குப்பிறகு படங்களிலிருந்து தடாலடியாக நீக்கப்பட்டு, அந்த இடத்திற்கு விஜய் போடப்பட்டதாக சினிமா வட்டாரங்கள் தெரிவிக்கின்றன. மேலதிக விபரங்களுக்கு பஸ்சுடன் இணைந்திருங்கள்..:p

பையா விமர்சனம்

வழமை போல எல்லாரும் எழுதி முடித்த பின்னரே நான் இந்த திரைப்பட விமர்சனத்தை எழுத ஆரம்பிக்கின்றேன். புதுவருட விடுமுறைக்கு யாழ் சென்று சும்மா ஆணி புடுங்கிக்கொண்டு இருந்த வேளையில் சோதரன் அழைக்கவே யாழ் நகர் சென்று பையா படம் பார்க்கச் சென்றேன்.

அதிகமாக எதிர்பார்ப்பு வைத்திருக்கவில்லை காரணம் ஏற்கனவே பலரும் பல விதமான விமர்சனங்களை முன்வைத்திருந்தமையே. சூப்பர் என்று சிலரும் மொக்கை என்று சிலரும் சொல்லி வைத்திருந்த காரணத்தால் நானே சென்று பார்த்து முடிவெடுப்பதாக இருந்தேன்.

திரைப்படம் தொடங்கியதில் இருந்து திரைப்படம் முடியும் வரை நாயகன் ஓடு ஓடு என்று ஓடுவார் அவர் கூட நாயகியும் ஓடுவார். வில்லனும் விதியும் விடாமல் துரத்தும். அவ்வகையான திரைப்படங்களை நாம் இது வரை பார்த்திருக்கின்றோம். அவ்வகையைச் சார்த்த திரைப்படம்தான் இந்த திரைப்படம்.

கார்த்தி பொறுப்பற்ற ஒரு இளைஞன். வாழ்வில் வித்தியாசமாக எதையும் முயற்சித்து காலம் கடத்துபவன். விதியின் செயலால் கட்டாயத் திருமணத்தில் இருந்து தமனாவைக் காப்பாற்றும் ஒரு பொறுப்பில் வீழ்கின்றான்.

கிடைத்த இரவல் காரில் தமானாவை ஏற்றிக் கொண்டு ஊர் ஊராக ஓடுவதும் பின்னால் இரண்டு ரவுடிக் கும்பல் துரத்துவதுமாகக் கதை. இடையில் சொல்ல நினைத்தும் சொல்லாமல் தவிக்கும் ஒரு காதல் வேற.

திரைப்படத்தில் என்ன சிறப்பு என்று கேட்டீர்களானால் என்னைப் பொறுத்தவரையில் பிண்ணனி இசை மற்றும் இரண்டு பாடல்கள். சண்டைக் காட்சியில் வரும் இலக்ரோனிக் கிட்டார் இசை எங்கள் மீசையையும் முறுக்க வைக்கின்றது. என் காதல் சொல்ல நேரம் இல்லை மற்றும் துளி துளி மழைத்துளியாய் வந்தாளே பாடல்கள் மனதில் நச்சென்று பதிந்து விடுகின்றன. மற்றய பாடல்கள் ஒட்டவில்லை.

லொஜிக் இல்லாத மொக்கை சண்டைகளுக்கு குறைவில்லை. இருபது முப்பது பேரை கார்த்தி ஒத்தையாளாக அடித்து வீழ்த்தும் போது.. ஷப்பா… ஆரம்பிச்சுட்டாங்கையா என்றுதான் சொல்லத் தோன்றுகின்றது. ஆனால் தியட்டரில் அந்த சண்டைக் காட்சிகளை விசிலடிச்சு இரசிக்கவும் ஒரு கூட்டம் இருக்கின்றது என்பதே உண்மை.

கார்த்தி நடிப்பு ஓ.கே. தமானா நடிப்பு என்று ஒன்றும் இல்லை ஆனால் கியூட்டா இருந்தாங்க. என்றாலும் கார்த்திதான் பெஸ்ட். 😉

கார்த்தியின் நடிப்பு ஆயிரத்தில் ஒருவன் மற்றும் பருத்தி வீரன் போன்ற திரைப்படங்களுடன் ஒப்பிடும் போது சுமார்தான். கார்த்தி சில இடங்களில் சூர்யாவையும் சில இடங்களில் சிவ குமாரையும் ஞாபகப் படுத்துகின்றார். இன்னும் சிறப்பாக எதிர் வரும் படங்களில் நடிப்பார் என்று நம்பலாம்.

படம் சூப்பரா இல்லை மொக்கையா என்று என்னிடம் கேட்டால் என் பதில் இரண்டும் இல்லை என்பதுதான். ஒரு தடவை தியட்டரில் பார்த்து இரசிக்க கூடிய திரைப்படம். திருட்டு வீசீடியில் பார்ப்பதற்கு இந்த திரைப்படத்தில் ஒன்றும் இல்லை.

அது சரி எதற்காக இந்த திரைப்படத்திற்கு “பையா” என்று பெயர் வைத்தனர்??? பேசாமல் பெங்களூரில் இருந்து மும்பாய் வரை என்று ஒரு பெயர் வைத்திருக்கலாம்.  வர வர லிங்குசாமியிடம் சரக்கு குறைந்து போகின்றதோ என்று எண்ணத் தோன்றுகின்றது.

வில்லு ஒரே லொள்ளு – விமர்சனம்

வில்லுவில் வரும் லொள்ளு விஜய்
வில்லுவில் வரும் லொள்ளு விஜய்

நேற்றய தினம் கடும் பண நெருக்கடி மத்தியிலும் ஹிந்தி கஜனி திரைப்படம் பார்த்துவிடும் திட சங்கர்ப்பத்துடன் மருதானை சினி சிட்டி திரையரங்குக்கு சென்றேன். வாசலில் ஒரே கூட்டம், என்னடா இது கஜனி படத்திற்கு இவ்வளவு கூட்டமா? பரவாயில்லை அமீர்கானுக்கு இப்ப தமிழ் இளசுகள் மட்டத்திலயும் நல்ல ஆதரவு இருக்கு என்று நினைத்துக்கொண்டு கிட்ட போனபோது தான் தெரிந்த்து, இளய தளபதி விசய் அவர்களின் திரைப்படம் வில்லு வெளியாகின்றது என்று.

என்னதானானாலும் கஜனி பார்த்துவிடும் வேகத்தில் உள்ளே சென்ற எனக்கு ஒரே ஏமாற்றம் காத்திருந்தது. அதிகமானோர் வில்லு பார்க்க வந்துள்ளதால் கஜனியை நிப்பாட்டி விட்டார்கள். அங்கே கஜனி பார்க்க சென்றது நானும் ஒரு சர்தார் ஜீயும்.

சர்தாரோ வாசலில் நிற்கும் காவலாளியிடம் ‘கஜனி நஹீ?’ என்று கேட்க அவனும் ‘நஹீ சார்’ என்றான்.

சரி வந்ததுதான் வந்தம் வில்லைப்பார்ரப்பம் என்று லைனில நின்று டிக்கட் எடுத்து உள்ளே சென்றேன். வழமை போல ஒரே இளைஞர் கூட்டம், சில இளைஞி இரசிகர்களும் இருந்தார்கள்.

படம் தொடங்கியதும் ஒரே விசில் சத்தம், அப்புறமாக எப்படா விஜய் வருவார் வருவார் என்று ஏங்கி இருந்த போது இறுதியாக விசய் வந்து சேர்ந்தார். என்ன கொடுமை சார், ஹூரோ அறிமுகம், விஜய் சேலை போர்த்திக்கொண்டு அறிமுகமாகின்றார். ஏதோ அவரை கற்பழிப்பது போல வில்லனுகள் துகிலுரிகின்றார்கள். அப்பவே எழுந்து போய் விடலாமா என்று இருந்த்து, என்றாலும் கொடுத்த 300 ரூபா இழுத்து உட்கார வைத்தது.

படம் தொடர்கிறது, எரிச்சல் அளவு கடந்து திரையைப் பார்க்காமல் அங்கும் இங்கும் பார்த்துக் கொண்டிருந்தேன். என் கெட்ட காலம் ஒரு அழகான பெட்டை கூட பக்கத்தில் இல்லை இல்லாவிட்டால் அத சரி நோட்டம் விட்டு நேரத்தைக் கடத்தியிருக்கலாம்.

படத்தில் விஜயை காட்டி அதில் ஒரு பிளாஷ் பேக் வேற, மகன் விஜயின் அநியாயம் தாங்காமல் தவிக்கும் நேரத்தில் அப்பா விசயையும் காட்டி நோகடித்தார்கள். ஏதோ பல்லிக்கு மீசை வைத்தது போல ஒரு உருவத்துடன் வருகின்றார் விஜய். அதில் உச்சகட்டம் அவர் இராணுவ அதிகாரியாம். அவர் எந்த ஆபரேஷன் போனாலும் தனியாத்தான் போவாராம். இரண்டு கையிலயும் இரண்டு A.K. 47 வைத்து சுடுவாராம். பாக்கிறவன் கேனை என்டா எருமையும் ஏரோபிளேன் ஓட்டும்.

சத்தியமாக சொல்லுகின்றேன், விஜய், சூர்யா, விக்ரம் போன்ற சக நடிகர்களைப் பார்த்து எவ்வாறு பாத்திரத்துக்கேற்றவாறு மாறுவது என்று தெரிந்து கொள்வது நலம்.

விஜய் இப்படி என்றால், நாயன்தாரா…. ஐயோ..! அவருக்கு பிங்கினி போடுவதை தவிர வேற எதுவுமே இந்தப் படத்தில் இல்லை.

வடிவேல் மட்டுமே திரைப்படத்தில் ஒரே ஆறுதல். நல்ல நகைச்சுவை. ஹூரோ அறிமுகத்தை விட வடிவேல் அறிமுகம் அபாரம்.

என்னைப்போல பல நொந்த உள்ளங்கள் உலகம் முழுதும் இருக்கும் என்று நம்புகின்றேன். ஒரு இரசிகனை இந்தளவுக்கு பேச வைத்திருக்கிறார் விசய் அவர்கள்.

இந்தப் பதிவில் ஒரு சத்தியம் எடுக்கின்றேன், ‘இனிமேல் விஜய் படங்களுக்கு, அந்தப் படம் பற்றி அறியாமல் உள்ளயே போகமாட்டேன்‘.